ترامپ ۆەنەسۋەلا اسكەرلەرىن مادۋروعا باعىنباۋعا شاقىردى

امەريكا قۇراما شتاتتارىنىڭ پرەزيدەنتى دونالد ترامپ ۆەنەسۋەلانى تاعى ءبىر مارتە سوتسياليزمنەن باس تارتۋعا شاقىردى. ول سونىمەن بىرگە اقش-تىڭ «بەيبىتشىلىكتى ساقتاۋعا كۇش سالاتىنىن، الايدا بارلىق مۇمكىندىكتەردى قولدانۋدى جوققا شىعارمايتىنىن»  ايتقان. ونىڭ بۇل ءسوزى ۆەنەسۋەلاعا قارسى اسكەري كۇش قولدانۋدىڭ مۇمكىن ەكەندىگىن مەڭزەگەن.

اقش پرەزيدەنتى سوزىندە ۆەنەسۋەلانىڭ قارۋلى كۇشتەرىنە ۇندەۋ تاستاپ،  پرەزيدەنت مادۋرونىڭ نۇسقاۋلارىن ەلەمەۋگە، كەرىسىنشە ءماجىلىس سپيكەرى گۋايدونىڭ بۇيرىعىنا باعىنۋعا شاقىرعان. سەبەبى، قۇراما شتات باستاعان 50-گە جۋىق مەملەكەتتىڭ حۋان گۋايدونى ۆەنەسۋەلانىڭ ۋاقىتشا پرەزيدەنتى رەتىندە مويىندايتىنىن العا تارتقان.

پرەزيدەنت ترامپ ۆەنەسۋەلانىڭ اسكەرلەرىنە ەسكەرتۋ جاساپ: «سىزدەر قاۋىپسىز جەر تابا المايسىزدار،  قاشىپ كەتۋ دە قيىنعا سوعادى، بارار جەر، باسار تاۋ جوق، ءبارىن جوعالتىپ الاسىزدار»، – دەگەن. سونىمەن بىرگە ۆەنەسۋەلاعا جەتكىزىلىپ جاتقان گۋمانيتارلىق كومەكتەرگە كەدەرگى جاساماۋدى ەسكەرتەدى.

كەشە ۆەنەسۋەلاعا جەتكىزىلەتىن گۋمانيتارلىق كومەكتەرگە اقش-تىڭ اسكەري ۇشاقتارى دا ارالاسا باستاعانى حابارلانعان بولاتىن. باتىس اقپارات قۇرالدارى بۇل ارەكەت نيكولاس مادۋرونىڭ بيلىگىن السىرەتۋگە ىقپال ەتەتىنىن ايتقان.

نيكولاس مادۋرو قۇراما شتات قاتارلى ەلدەردەن كەلەتىن گۋمانيتارلىق كومەكتىڭ قاجەت ەمەس ەكەنىن ايتىپ، بۇل زاتتار اقش اسكەرىنىڭ ۆەنەسۋەلاعا كىرۋىنە جول اشاتىنىن ايتقان.

قازىر ۆەنەسۋەلادا ازىق-تۇلىك، ءدارى-دارمەك جانە تۇرمىستىق تۇتىنۋ بۇيىمدارىنىڭ تاپشىلىعى ارتۋدا. ينفلياتسيا الەمدەگى ەڭ جوعارى كورسەتكىشكە جەتكەن ۆەنەسۋەلادا سوڭعى جىلدارى 3 ملن ادام شەتەلگە قونىس اۋدارعان. بۇل ەل حالقىنىڭ 10 پايىزىن قۇرايدى.

 “The Qazaq Times”