Tramp-Kim sammiti. Foto: TheHill.

AQŞ-tıñ memlekettik hatşısı Mayk Pompeo Fox News arnasınıñ swhbatın qabıldağan kezde,  AQŞ prezidenti Donal'd Tramp pen Soltüstik Koreya basşısı Kim Joñ Unnıñ ekinşi retki sammitine dayındıq jwmıstarı üşin Aziyağa arnayı delegaciya attandırğalı otırğanın mälimdedi.

Birinşi retki «Tramp-Kim» sammitine wqsas, kezekti kezdesudiñ naqtı uaqıtı men orını turalı aldın ala mälimet berilmeytinin eskertken Pompeo, Soltüstik Koreya tarabı da kezdesuge dayındalıp jatqanın aytqan.

«Soltüstik Koreyanı yadrolıq qarusızdandıru mindetin orındau üşin, ükimetimiz Soltüstik Koreyamen belsendi jwmıs isteydi. Soltüstik Koreyanıñ eñ joğarı basşısı Kim Joñ Un bwl isti jüzege asıruğa dayın ekenin aytıp otır», – dedi AQŞ-tıñ memlekettik hatşısı.

Degenmen, AQŞ wlttıq barlau qızmetiniñ direktorı  Den Kouts särsenbi küni Kongreske jasağan bayandamasında, Wlttıq barlau agenttikteriniñ mälimetin alğa tarta otırıp, Soltüstik Koreyanıñ yadrolıq qarudan bas tarta almaytının, yadrolıq qarudı şekteuge qarsı äreketterin jalğastıra beretinin aytqan. Bwl prezident Tramptıñ Soltüstik Koreyamen dialogta ülken jetistikke jetkeni turalı mälimdemesine qayşı bolıp şıqtı.

Bwl turalı sözinde Pompeo: «Bizdiñ qazirgi biluimizşe, Soltüstik Koreya jappay qırıp-joyğış qarulardı saqtap qaluğa tırısatını anıq, yağni yadrolıq qaru men onı öndiru mümkindikterin tolığımen tastay almaydı. Bwnıñ sebebi – Soltüstik Koreyadağı bileuşi jetekşiler yadrolıq qarudı KHDR rejiminiñ bar bolıp twruınıñ kilti retinde qaraydı. Sonday-aq, biz keybir äreketterdiñ tolıqtay yadrolıq qarusızdanu uädesine say emes ekenin de bayqap otırmız. Sondıqtan biz yadrolıq qarusızdanu mäselesinde satılı kelissözderge mümkindik berip otırmız», – degen.

Qaytalay eske sala keteyik, bıltır mausım ayında Singapurda Tramp pen Kim arasında Tarihi sammit ötti. Kezdesude KHDR basşısı yadrolıq qarudan bas tartıp, Qwrama Ştattıñ ekonomikalıq demeuin qabıl alatının aytqan. Eki el arasındağı qarqındı dialogtar, diplomatiyalıq iştesuge qaramastan yadrolıq qarusızdan procesi alğa baspay-aq qoyğan edi. Biraq, AQŞ prezidenti Pioñyañmen mämileniñ jaqsarıp kele jatqanın, atalğan mindetti jüzege asıra alatının birneşe ret mälimdegen bolatın.

“The Qazaq Times”