اقش لاۋازىمدىلارى سولتۇستىك كورەيانىڭ يادرولىق قارۋدان باس تارتپايتىنىن راستادى

اقش-تىڭ مەملەكەتتىك حاتشىسى مايك پومپەو Fox News ارناسىنىڭ سۇحباتىن قابىلداعان كەزدە،  اقش پرەزيدەنتى دونالد ترامپ پەن سولتۇستىك كورەيا باسشىسى كيم جوڭ ۋننىڭ ەكىنشى رەتكى سامميتىنە دايىندىق جۇمىستارى ءۇشىن ازياعا ارنايى دەلەگاتسيا اتتاندىرعالى وتىرعانىن مالىمدەدى.

ءبىرىنشى رەتكى «ترامپ-كيم» سامميتىنە ۇقساس، كەزەكتى كەزدەسۋدىڭ ناقتى ۋاقىتى مەن ورىنى تۋرالى الدىن الا مالىمەت بەرىلمەيتىنىن ەسكەرتكەن پومپەو، سولتۇستىك كورەيا تارابى دا كەزدەسۋگە دايىندالىپ جاتقانىن ايتقان.

«سولتۇستىك كورەيانى يادرولىق قارۋسىزداندىرۋ مىندەتىن ورىنداۋ ءۇشىن، ۇكىمەتىمىز سولتۇستىك كورەيامەن بەلسەندى جۇمىس ىستەيدى. سولتۇستىك كورەيانىڭ ەڭ جوعارى باسشىسى كيم جوڭ ۋن بۇل ءىستى جۇزەگە اسىرۋعا دايىن ەكەنىن ايتىپ وتىر»، – دەدى اقش-تىڭ مەملەكەتتىك حاتشىسى.

دەگەنمەن، اقش ۇلتتىق بارلاۋ قىزمەتىنىڭ ديرەكتورى  دەن كوۋتس سارسەنبى كۇنى كونگرەسكە جاساعان بايانداماسىندا، ۇلتتىق بارلاۋ اگەنتتىكتەرىنىڭ مالىمەتىن العا تارتا وتىرىپ، سولتۇستىك كورەيانىڭ يادرولىق قارۋدان باس تارتا المايتىنىن، يادرولىق قارۋدى شەكتەۋگە قارسى ارەكەتتەرىن جالعاستىرا بەرەتىنىن ايتقان. بۇل پرەزيدەنت ترامپتىڭ سولتۇستىك كورەيامەن ديالوگتا ۇلكەن جەتىستىككە جەتكەنى تۋرالى مالىمدەمەسىنە قايشى بولىپ شىقتى.

بۇل تۋرالى سوزىندە پومپەو: «ءبىزدىڭ قازىرگى بىلۋىمىزشە، سولتۇستىك كورەيا جاپپاي قىرىپ-جويعىش قارۋلاردى ساقتاپ قالۋعا تىرىساتىنى انىق، ياعني يادرولىق قارۋ مەن ونى ءوندىرۋ مۇمكىندىكتەرىن تولىعىمەن تاستاي المايدى. بۇنىڭ سەبەبى – سولتۇستىك كورەياداعى بيلەۋشى جەتەكشىلەر يادرولىق قارۋدى كحدر رەجيمىنىڭ بار بولىپ تۇرۋىنىڭ كىلتى رەتىندە قارايدى. سونداي-اق، ءبىز كەيبىر ارەكەتتەردىڭ تولىقتاي يادرولىق قارۋسىزدانۋ ۋادەسىنە ساي ەمەس ەكەنىن دە بايقاپ وتىرمىز. سوندىقتان ءبىز يادرولىق قارۋسىزدانۋ ماسەلەسىندە ساتىلى كەلىسسوزدەرگە مۇمكىندىك بەرىپ وتىرمىز»، – دەگەن.

قايتالاي ەسكە سالا كەتەيىك، بىلتىر ماۋسىم ايىندا سينگاپۋردا ترامپ پەن كيم اراسىندا تاريحي سامميت ءوتتى. كەزدەسۋدە كحدر باسشىسى يادرولىق قارۋدان باس تارتىپ، قۇراما شتاتتىڭ ەكونوميكالىق دەمەۋىن قابىل الاتىنىن ايتقان. ەكى ەل اراسىنداعى قارقىندى ديالوگتار، ديپلوماتيالىق ىشتەسۋگە قاراماستان يادرولىق قارۋسىزدان پروتسەسى العا باسپاي-اق قويعان ەدى. بىراق، اقش پرەزيدەنتى پيوڭياڭمەن مامىلەنىڭ جاقسارىپ كەلە جاتقانىن، اتالعان مىندەتتى جۇزەگە اسىرا الاتىنىن بىرنەشە رەت مالىمدەگەن بولاتىن.

“The Qazaq Times”