Iran men Izrail' qayşılığı küşeydi. Foto; Center for Israel Education.

Izrail' tarabı Süriya jerindegi Iran küşteriniñ baqılauındağı nısandarğa şabuıl jasaytının eskertti. Bwl Iran qauipsizdik küşteri jağınan ayıptau men sın-pikirlerge wşıradı. Iran Islam revolyuciyası Saqşılar korpusınıñ orınbasar bas qolbasşısı arnayı mälimdeme jasap, Izrail'ge eskertu jasadı. Bwl turalı IRNA aqparattıq agenttigi habarladı.

IIR Saqşılar korpusınıñ bas qolbasşısınıñ orınbasarı, general Husein Salami mälimdemesinde: «Eger Izrail' ükimeti jaña soğıs bastau turalı äreket etse, bwl soğıs Izrail'diñ joyıluına  alıp keledi», – dedi. Ol jäne IIR-nıñ bastı maqsatı Izrail' rejimin joyu ekenin aşıq ayttı. «Irannıñ bastı strategiyası – Izrail'di älemniñ sayasi kartasınan joyu. Izrail' ükimeti jasap jatqan äreketter bwl şındıqqa barğan sayın özderin jaqındatıp keledi», – dedi.

Huseyn Salami. Foto: IRNA.

Osıdan bwrın Izrail' prem'er-ministri Ben'yamin Netan'yahu Iranğa eskertu jasap, Süriya jerindegi qarulı küşterin tez arada şığarıp äketuin talap etken. «Eger Iran öz küşterin Süriyadan şığarmasa, biz şabuıldı jalğastıramız», – dep eskertken.

Orta Şığısta Tehran (Tegeran) men Tel'-Aviv strategiyalıq qarsılas retinde belgili. Tel'-Aviv tarabı Süriya jerindegi Iran küşteri Izrail'diñ qauipsizdigine qater töndiredi dep alañdaydı. Al Iran Izrail' rejimi öñirde islamnıñ bastı jauı dep sanaydı, äri Izrail'di Palestina jerinen quıp şığudı bastı strategiyalıq maqsatınıñ biri retinde wstanadı. Bwl qayşılıq eki rejim arasındağı teke-tiresti barğan sayın örşitip keledi.

“The Qazaq Times”