يزرايل تارابى ءسۇريا جەرىندەگى يران كۇشتەرىنىڭ باقىلاۋىنداعى نىساندارعا شابۋىل جاسايتىنىن ەسكەرتتى. بۇل يران قاۋىپسىزدىك كۇشتەرى جاعىنان ايىپتاۋ مەن سىن-پىكىرلەرگە ۇشىرادى. يران يسلام رەۆوليۋتسياسى ساقشىلار كورپۋسىنىڭ ورىنباسار باس قولباسشىسى ارنايى مالىمدەمە جاساپ، يزرايلگە ەسكەرتۋ جاسادى. بۇل تۋرالى IRNA اقپاراتتىق اگەنتتىگى حابارلادى.

ير ساقشىلار كورپۋسىنىڭ باس قولباسشىسىنىڭ ورىنباسارى، گەنەرال حۋسەين سالامي مالىمدەمەسىندە: «ەگەر يزرايل ۇكىمەتى جاڭا سوعىس باستاۋ تۋرالى ارەكەت ەتسە، بۇل سوعىس ءيزرايلدىڭ جويىلۋىنا  الىپ كەلەدى»، – دەدى. ول جانە ير-نىڭ باستى ماقساتى يزرايل رەجيمىن جويۋ ەكەنىن اشىق ايتتى. «يراننىڭ باستى ستراتەگياسى – ءيزرايلدى الەمنىڭ ساياسي كارتاسىنان جويۋ. يزرايل ۇكىمەتى جاساپ جاتقان ارەكەتتەر بۇل شىندىققا بارعان سايىن وزدەرىن جاقىنداتىپ كەلەدى»، – دەدى.

حۋسەين سالامي. فوتو: IRNA.

وسىدان بۇرىن يزرايل پرەمەر-ءمينيسترى بەنيامين نەتانياحۋ يرانعا ەسكەرتۋ جاساپ، ءسۇريا جەرىندەگى قارۋلى كۇشتەرىن تەز ارادا شىعارىپ اكەتۋىن تالاپ ەتكەن. «ەگەر يران ءوز كۇشتەرىن ءسۇريادان شىعارماسا، ءبىز شابۋىلدى جالعاستىرامىز»، – دەپ ەسكەرتكەن.

ورتا شىعىستا تەھران (تەگەران) مەن تەل-اۆيۆ ستراتەگيالىق قارسىلاس رەتىندە بەلگىلى. تەل-اۆيۆ تارابى ءسۇريا جەرىندەگى يران كۇشتەرى ءيزرايلدىڭ قاۋىپسىزدىگىنە قاتەر توندىرەدى دەپ الاڭدايدى. ال يران يزرايل رەجيمى وڭىردە يسلامنىڭ باستى جاۋى دەپ سانايدى، ءارى ءيزرايلدى پالەستينا جەرىنەن قۋىپ شىعۋدى باستى ستراتەگيالىق ماقساتىنىڭ ءبىرى رەتىندە ۇستانادى. بۇل قايشىلىق ەكى رەجيم اراسىنداعى تەكە-تىرەستى بارعان سايىن ءورشىتىپ كەلەدى.

“The Qazaq Times”