AQŞ Senatı Saud Arabiyasına äskeri qoldau körsetuden bas tarttı

AQŞ Senatı jurnalist Jamal Haşoggidiñ ölimine baylanıstı Yemendegi qaqtığısta Saud Arabiyasına äskeri kömekti toqtatu turalı şeşimge keldi.

Zañ şığaruşılar qabıldağan qararda kisi öltirgeni üşin bastı kinäli retinde Saud Arabiyasınıñ taq mwrageri Mwhammed bin Salman tanıldı. Tağı bir qwjat amerikalıq äskerlerdi Yemennen şığaruğa bağıttalğan. Bwl qararğa 56 senator qoldap dauıs berse, 41-i qarsı boldı. Osı qarardan keyin Senat Saud biligi kinälilerdi jazalauı tiis degen şart qoydı. Rezolyuciya äli de talqılanadı jäne onı AQŞ prezidenti Donal'd Tramp tekserip şığuı tiis. Degenmen, atalğan qwjat AQŞ Kongresi ökilderiniñ palatasımen bekitilui ekitalay.

Qararda aytılğanday, Yemen qaqtığısı boyınşa endi AQŞ-tıñ barlıq äskeri küşterin elge qaytaru kerek. Qwjat avtorlarınıñ aytuınşa, Haşoggi isine qatıstı qatañ şaralar orındaluı tiis. «AQŞ Senatı birauızdan Mwhammed bin Salman Jamal Haşoggidiñ ölimine jauaptı ekenin mälimdedi. Bwl – qatañ qarar. Meniñ oyımşa, osı şeşim Qwrama Ştattarınıñ mıqtılığın bildiredi», – deydi Halıqaralıq qatınastar komitetiniñ törağası Bob Korker.

Vermont ştatınıñ täuelsiz senatorı Berni Sanders rezolyuciyanı tarihi sät dep atadı. «Bügin biz Saud Arabiyasınıñ despotikalıq rejimin äşkereleymiz, yağni endi bizdiñ jasaq olardıñ äskeri avantyurasına qatıspaytın boladı», – dedi ol.

Ötken aptada Ortalıq Barlau Basqarmasınıñ basşısı Djina Haspel Senattıñ halıqaralıq qatınastar jönindegi komitetine Türkiyadağı Saud Arabiya konsuldığında bolğan jağdayğa bey-jay qaramau kerektigin aytqan soñ, jurnalist ölimi men adam qwqıqtarı mäselesin talqılauğa qatıstı jabıq rejimdegi brifing ötti. Sol kezde OBB basşısı Lindsi Grem Saud Arabiyasına qaru-jaraq satuğa jäne Yemendegi soğısta olardı jaqtap, kömektesuge bolmaydı dedi. Al resmi Aq üy Saud Arabiyasımen qarım-qatınas basqa da qauip-qaterge qarsı twru üşin öte mañızdı dep mälimdey otırıp, qarardı qabıldaudan bas tarttı.

"The Qazaq Times"