اقش سەناتى جۋرناليست جامال حاشوگگيدىڭ ولىمىنە بايلانىستى يەمەندەگى قاقتىعىستا ساۋد ارابياسىنا اسكەري كومەكتى توقتاتۋ تۋرالى شەشىمگە كەلدى.

زاڭ شىعارۋشىلار قابىلداعان قاراردا كىسى ولتىرگەنى ءۇشىن باستى كىنالى رەتىندە ساۋد ارابياسىنىڭ تاق مۇراگەرى مۇحاممەد بين سالمان تانىلدى. تاعى ءبىر قۇجات امەريكالىق اسكەرلەردى يەمەننەن شىعارۋعا باعىتتالعان. بۇل قارارعا 56 سەناتور قولداپ داۋىس بەرسە، 41-ءى قارسى بولدى. وسى قاراردان كەيىن سەنات ساۋد بيلىگى كىنالىلەردى جازالاۋى ءتيىس دەگەن شارت قويدى. رەزوليۋتسيا ءالى دە تالقىلانادى جانە ونى اقش پرەزيدەنتى دونالد ترامپ تەكسەرىپ شىعۋى ءتيىس. دەگەنمەن، اتالعان قۇجات اقش كونگرەسى وكىلدەرىنىڭ پالاتاسىمەن بەكىتىلۋى ەكىتالاي.

قاراردا ايتىلعانداي، يەمەن قاقتىعىسى بويىنشا ەندى اقش-تىڭ بارلىق اسكەري كۇشتەرىن ەلگە قايتارۋ كەرەك. قۇجات اۆتورلارىنىڭ ايتۋىنشا، حاشوگگي ىسىنە قاتىستى قاتاڭ شارالار ورىندالۋى ءتيىس. «اقش سەناتى ءبىراۋىزدان مۇحاممەد بين سالمان جامال حاشوگگيدىڭ ولىمىنە جاۋاپتى ەكەنىن مالىمدەدى. بۇل – قاتاڭ قارار. مەنىڭ ويىمشا، وسى شەشىم قۇراما شتاتتارىنىڭ مىقتىلىعىن بىلدىرەدى»، – دەيدى حالىقارالىق قاتىناستار كوميتەتىنىڭ توراعاسى بوب كوركەر.

ۆەرمونت شتاتىنىڭ تاۋەلسىز سەناتورى بەرني ساندەرس رەزوليۋتسيانى تاريحي ءسات دەپ اتادى. «بۇگىن ءبىز ساۋد ارابياسىنىڭ دەسپوتيكالىق رەجيمىن اشكەرەلەيمىز، ياعني ەندى ءبىزدىڭ جاساق ولاردىڭ اسكەري اۆانتيۋراسىنا قاتىسپايتىن بولادى»، – دەدى ول.

وتكەن اپتادا ورتالىق بارلاۋ باسقارماسىنىڭ باسشىسى دجينا حاسپەل سەناتتىڭ حالىقارالىق قاتىناستار جونىندەگى كوميتەتىنە تۇركياداعى ساۋد ارابيا كونسۋلدىعىندا بولعان جاعدايعا بەي-جاي قاراماۋ كەرەكتىگىن ايتقان سوڭ، جۋرناليست ءولىمى مەن ادام قۇقىقتارى ماسەلەسىن تالقىلاۋعا قاتىستى جابىق رەجيمدەگى بريفينگ ءوتتى. سول كەزدە وبب باسشىسى ليندسي گرەم ساۋد ارابياسىنا قارۋ-جاراق ساتۋعا جانە يەمەندەگى سوعىستا ولاردى جاقتاپ، كومەكتەسۋگە بولمايدى دەدى. ال رەسمي اق ءۇي ساۋد ارابياسىمەن قارىم-قاتىناس باسقا دا قاۋىپ-قاتەرگە قارسى تۇرۋ ءۇشىن وتە ماڭىزدى دەپ مالىمدەي وتىرىپ، قاراردى قابىلداۋدان باس تارتتى.

"The Qazaq Times"