KHDR tarabı äli reakciya tanıtpadı. Foto: VOA.

AQŞ adam qwqıqtarın eleuli türde bwzudı jalğastırdı jäne cenzura jürgizdi degen ayıppen Soltüstik Koreyanıñ joğarı därejeli üş lauazımdısın sankciya tizimine engizdi. Bwl turalı VOA aqparattıq qızmeti habarladı.

AQŞ Qarjı ministri Mnuçin mälimdemesinde, kezekti sankciya tizimine ilingen 3 lauazımdı basqarğan memlekettik organdar wzaq uaqıttan beri halıqtıñ bas bostandığı men qwqığına qol swğıp, baqılauda wstap keldi dep ayıptağan. Ol jäne: «AQŞ ärqaşan Soltüstik Koreya rejiminiñ adam qwqıqtarı men negizgi bostandıqtarın bwzğanı üşin swrauşı boladı», – degen.

AQŞ-tıñ kezekti sankciyasına Soltüstik Koreyanıñ Wlttıq qauipsizdik departamentiniñ meñgeruşisi, Wyımdıq basşılıq bölimi jäne ügit-nasihat böliminiñ basşıları kirgen. Sankciya talabı boyınşa, atalğan twlğalardıñ AQŞ-tağı mal-mülki mwzdatıladı jäne amerikalıqtarmen biznes jürgizuine şekteu qoyıladı.

Bwl AQŞ pen Soltüstik Koreya arasındağı endi ğana jaqsarıp kele jatqan diplomatiyağa özindik keri äserin tigizui mümkin. Qwrama Ştat tarabı Soltüstik Koreyanı yadrolıq qarudan bas tartumen birge adamdıq qwqıq mäseleleriniñ AQŞ talaptarına say boluın qalaydı. Alayda bwl endi ğana betbwrısqa kelgen Soltüstik Koreya rejimi üşin jaulıq sayasatı retinde qabıldanuı ğajap emes.

“The Qazaq Times”