كحدر تارابى ءالى رەاكتسيا تانىتپادى. فوتو: VOA.

اقش ادام قۇقىقتارىن ەلەۋلى تۇردە بۇزۋدى جالعاستىردى جانە تسەنزۋرا جۇرگىزدى دەگەن ايىپپەن سولتۇستىك كورەيانىڭ جوعارى دارەجەلى ءۇش لاۋازىمدىسىن سانكتسيا تىزىمىنە ەنگىزدى. بۇل تۋرالى VOA اقپاراتتىق قىزمەتى حابارلادى.

اقش قارجى ءمينيسترى منۋچين مالىمدەمەسىندە، كەزەكتى سانكتسيا تىزىمىنە ىلىنگەن 3 لاۋازىمدى باسقارعان مەملەكەتتىك ورگاندار ۇزاق ۋاقىتتان بەرى حالىقتىڭ باس بوستاندىعى مەن قۇقىعىنا قول سۇعىپ، باقىلاۋدا ۇستاپ كەلدى دەپ ايىپتاعان. ول جانە: «اقش ارقاشان سولتۇستىك كورەيا رەجيمىنىڭ ادام قۇقىقتارى مەن نەگىزگى بوستاندىقتارىن بۇزعانى ءۇشىن سۇراۋشى بولادى»، – دەگەن.

اقش-تىڭ كەزەكتى سانكتسياسىنا سولتۇستىك كورەيانىڭ ۇلتتىق قاۋىپسىزدىك دەپارتامەنتىنىڭ مەڭگەرۋشىسى، ۇيىمدىق باسشىلىق ءبولىمى جانە ۇگىت-ناسيحات ءبولىمىنىڭ باسشىلارى كىرگەن. سانكتسيا تالابى بويىنشا، اتالعان تۇلعالاردىڭ اقش-تاعى مال-مۇلكى مۇزداتىلادى جانە امەريكالىقتارمەن بيزنەس جۇرگىزۋىنە شەكتەۋ قويىلادى.

بۇل اقش پەن سولتۇستىك كورەيا اراسىنداعى ەندى عانا جاقسارىپ كەلە جاتقان ديپلوماتياعا وزىندىك كەرى اسەرىن تيگىزۋى مۇمكىن. قۇراما شتات تارابى سولتۇستىك كورەيانى يادرولىق قارۋدان باس تارتۋمەن بىرگە ادامدىق قۇقىق ماسەلەلەرىنىڭ اقش تالاپتارىنا ساي بولۋىن قالايدى. الايدا بۇل ەندى عانا بەتبۇرىسقا كەلگەن سولتۇستىك كورەيا رەجيمى ءۇشىن جاۋلىق ساياساتى رەتىندە قابىلدانۋى عاجاپ ەمەس.

“The Qazaq Times”