Irannıñ ballistikalıq zımıran sınağı. Foto: Iran Review.

BWW Qauipsizdik keñesinde Irannıñ zımıran bağdarlamasın taqırıp etken otırıs ötkizdi. Iran ballistikalıq zımıran sınağın ayıptağan Wlıbritaniya men Franciya atalğan otırıstı ötkizuge wsınıs jasağan bolatın.

Jabıq otırısta Irannıñ ballistikalıq zımıran sınağın ötkizgeni turalı mälimetter talqılauğa salındı. AQŞ tarabı Tehran (Tegeran) biligi Qauipsizdik keñestiñ şeşimderin bwzdı dep ayıptadı jäne Qauipsizdik keñes müşelerinen Iranğa qarsı ayıptaudı qoldauğa şaqırdı.  AQŞ-tıñ BWW-dağı ökili Nikki Heyli Irannıñ kezekti zımıran sınağı «arandatuğa bağıttaldı» dep bağaladı.

Iran Islam Respublikasınıñ kezekti zımıran sınağı BWW QK şeşimderine qayşı ekenin Britaniya men Franciya tarabı da qoldadı. Atalğan taraptar Iran ükimetin ballistikalıq zımıranğa qatıstı barlıq jobaların toqtatuğa şaqırdı.

Osımen bir uaqıtta Iran Qorğanıs ministrligi mälimdeme jasap, Iran zımıran sınağın taqırıp etken ayıptaular men otırıs negizsiz dep bağaladı. Äri, Sırtqı ister ministrligi internettegi resmi saytı arqılı jazbaşa mälimdeme jasap, Franciya men Britaniyanıñ Qauipsizdik keñeske Iran zımıranı turalı otırısqa şaqıru äreketin sınğa alğan.

Iran SİM ökili Bahram Qasımi mälimdemesinde: «Ballistikalıq zımırandar Iran qorğanıs qauipsizdiginiñ mañızdı bölegi. Biz zımırandarğa yadrolıq oq twmsıqtardı qoldanu turalı eşqanday bağdarlama tüzbedik. Qorğanıs bağdarlamaları özimizge töngen qauipterge qaray retteledi. Bwl äreketter Irandı ballistikalıq zımırannan tolığımen bas tartuğa mäjbürleu, sol arqılı Irannıñ qauipsizdik quatın älsiretuge bağıttalğan», – dedi.

Iran sonday-aq, Saud Arabiyasınıñ Yemendegi äskeri äreketterine ünsiz qalğan Batıs elderi, özderiniñ beybit maqsattağı sınaqtarın ayıptağanın sınğa aldı.

“The Qazaq Times”