يراننىڭ بالليستيكالىق زىمىران سىناعى. فوتو: Iran Review.

بۇۇ قاۋىپسىزدىك كەڭەسىندە يراننىڭ زىمىران باعدارلاماسىن تاقىرىپ ەتكەن وتىرىس وتكىزدى. يران بالليستيكالىق زىمىران سىناعىن ايىپتاعان ۇلىبريتانيا مەن فرانتسيا اتالعان وتىرىستى وتكىزۋگە ۇسىنىس جاساعان بولاتىن.

جابىق وتىرىستا يراننىڭ بالليستيكالىق زىمىران سىناعىن وتكىزگەنى تۋرالى مالىمەتتەر تالقىلاۋعا سالىندى. اقش تارابى تەھران (تەگەران) بيلىگى قاۋىپسىزدىك كەڭەستىڭ شەشىمدەرىن بۇزدى دەپ ايىپتادى جانە قاۋىپسىزدىك كەڭەس مۇشەلەرىنەن يرانعا قارسى ايىپتاۋدى قولداۋعا شاقىردى.  اقش-تىڭ بۇۇ-داعى وكىلى نيككي حەيلي يراننىڭ كەزەكتى زىمىران سىناعى «ارانداتۋعا باعىتتالدى» دەپ باعالادى.

يران يسلام رەسپۋبليكاسىنىڭ كەزەكتى زىمىران سىناعى بۇۇ قك شەشىمدەرىنە قايشى ەكەنىن بريتانيا مەن فرانتسيا تارابى دا قولدادى. اتالعان تاراپتار يران ۇكىمەتىن بالليستيكالىق زىمىرانعا قاتىستى بارلىق جوبالارىن توقتاتۋعا شاقىردى.

وسىمەن ءبىر ۋاقىتتا يران قورعانىس مينيسترلىگى مالىمدەمە جاساپ، يران زىمىران سىناعىن تاقىرىپ ەتكەن ايىپتاۋلار مەن وتىرىس نەگىزسىز دەپ باعالادى. ءارى، سىرتقى ىستەر مينيسترلىگى ينتەرنەتتەگى رەسمي سايتى ارقىلى جازباشا مالىمدەمە جاساپ، فرانتسيا مەن بريتانيانىڭ قاۋىپسىزدىك كەڭەسكە يران زىمىرانى تۋرالى وتىرىسقا شاقىرۋ ارەكەتىن سىنعا العان.

يران ءسىم وكىلى باحرام قاسىمي مالىمدەمەسىندە: «بالليستيكالىق زىمىراندار يران قورعانىس قاۋىپسىزدىگىنىڭ ماڭىزدى بولەگى. ءبىز زىمىراندارعا يادرولىق وق تۇمسىقتاردى قولدانۋ تۋرالى ەشقانداي باعدارلاما تۇزبەدىك. قورعانىس باعدارلامالارى وزىمىزگە تونگەن قاۋىپتەرگە قاراي رەتتەلەدى. بۇل ارەكەتتەر يراندى بالليستيكالىق زىمىراننان تولىعىمەن باس تارتۋعا ماجبۇرلەۋ، سول ارقىلى يراننىڭ قاۋىپسىزدىك قۋاتىن السىرەتۋگە باعىتتالعان»، – دەدى.

يران سونداي-اق، ساۋد ارابياسىنىڭ يەمەندەگى اسكەري ارەكەتتەرىنە ءۇنسىز قالعان باتىس ەلدەرى، وزدەرىنىڭ بەيبىت ماقساتتاعى سىناقتارىن ايىپتاعانىن سىنعا الدى.

“The Qazaq Times”