Halyk Bank pen  Qazkom Apple Pay qızmetin iske qostı

Bwdan bılay Halyk Bank pen  Qazkom bankteriniñ Mastercard jäne Visa kartaların qoldanuşılar tauarlar men qızmetter tölemderin Apple Pay arqılı jasauğa mümkindik aldı.  Bwl turalı Almatıda ötken jaña servistiñ tanıstırılımında Halıq bank Basqarma Törağasınıñ orınbasarı Nwrlan Jağıparov ayttı.

"Halyk Bank pen  Qazkom Apple Pay qızmetin iske qostı. Büginnen bastap bizdiñ klientterimiz tauarlar men qızmetterge kontaktisiz tölem jürgize aladı. Jalpı, bwl bwrınnan josparımızda bolğan. Alayda eki banktiñ biriguine baylanıstı keyinge qaldırıldı. Qazir bankterdiñ integraciyalanu procesi sätti ayaqtaldı, biz de bwl jüyeni iske qosudı qolğa aldıq", - dedi ol.

Basqarma törağası orınbasarınıñ aytuınşa, Apple kompaniyasımen kelissöz jürgizu de oñay bolmağan. Onıñ üstine bir emes, eki birdey, yağni, Mastercard jäne Visa kartalarına qosu üşin bir jıldan astam uaqıt ketken. Öytkeni,  bwl tehnikalıq  twrğıdan da oñay şarua emes.  Sonday-aq, ol bwl qızmettiñ  älemniñ damığan memleketterinde de äli iske qosılmağanın atap ötti.

Apple Pay qızmetin iske qosudıñ ülgisi

"Qazaqstan Apple Pay qızmetin iske qosqan 30 eldiñ qatarında. Tipti, damığan el Germaniyada da mwnday mümkindik joq äzirge. Uaqıt ayırmaşılığına baylanıstı Qazaqstan Bel'giyadan da bwrın iske qostı. Sebebi,  olarda da jaña servistiñ prezentaciyası büginge josparlanğan", - dedi ol.

Sonday-aq, Halyk Bank pen  Qazkom kartaların qoldanuşılar üşin bank  Starbucks, Marrone Rosso, Angel-In-Us sekildi kafelerinde Apple Pay arqılı tölegen jağdayda  5% Go!  bonusın wsınadı. Basqarma törağası orınbasarınıñ aytuınşa, bwl tizim äli de köbeyedi. Bwl tek büginge deyin seriktes bop ülgergen kompaniyalardıñ qatarı. Sonımen birge, jüyege qosılğan kezde de atalğan  karta ieleri  500 Go! bonusına ie boladı.

Apple Pay qızmetin iske qosu oñay. Klientter Halyk Bank pen  Qazkom-nıñ Mastercard jäne Visa kartasın  Homebank nemese Wallet apptarı arqılı tölem qızmetine qosa aladı. Dükenderde Apple Pay arqılı tölem jürgizu üşin Ayfon telefonınıñ barlıq soñğı ülgileri men Apple Watch - ti qoldanuğa boladı.

"The Qazaq Times"