Halyk Bank پەن  Qazkom Apple Pay قىزمەتىن ىسكە قوستى

بۇدان بىلاي Halyk Bank پەن  Qazkom بانكتەرىنىڭ Mastercard جانە Visa كارتالارىن قولدانۋشىلار تاۋارلار مەن قىزمەتتەر تولەمدەرىن Apple Pay ارقىلى جاساۋعا مۇمكىندىك الدى.  بۇل تۋرالى الماتىدا وتكەن جاڭا سەرۆيستىڭ تانىستىرىلىمىندا حالىق بانك باسقارما توراعاسىنىڭ ورىنباسارى نۇرلان جاعىپاروۆ ايتتى.

"Halyk Bank پەن  Qazkom Apple Pay قىزمەتىن ىسكە قوستى. بۇگىننەن باستاپ ءبىزدىڭ كليەنتتەرىمىز تاۋارلار مەن قىزمەتتەرگە كونتاكتىسىز تولەم جۇرگىزە الادى. جالپى، بۇل بۇرىننان جوسپارىمىزدا بولعان. الايدا ەكى بانكتىڭ بىرىگۋىنە بايلانىستى كەيىنگە قالدىرىلدى. قازىر بانكتەردىڭ ينتەگراتسيالانۋ پروتسەسى ءساتتى اياقتالدى، ءبىز دە بۇل جۇيەنى ىسكە قوسۋدى قولعا الدىق", - دەدى ول.

باسقارما توراعاسى ورىنباسارىنىڭ ايتۋىنشا، Apple كومپانياسىمەن كەلىسسوز جۇرگىزۋ دە وڭاي بولماعان. ونىڭ ۇستىنە ءبىر ەمەس، ەكى بىردەي، ياعني، Mastercard جانە Visa كارتالارىنا قوسۋ ءۇشىن ءبىر جىلدان استام ۋاقىت كەتكەن. ويتكەنى،  بۇل تەحنيكالىق  تۇرعىدان دا وڭاي شارۋا ەمەس.  سونداي-اق، ول بۇل قىزمەتتىڭ  الەمنىڭ دامىعان مەملەكەتتەرىندە دە ءالى ىسكە قوسىلماعانىن اتاپ ءوتتى.

Apple Pay قىزمەتىن ىسكە قوسۋدىڭ ۇلگىسى

"قازاقستان Apple Pay قىزمەتىن ىسكە قوسقان 30 ەلدىڭ قاتارىندا. ءتىپتى، دامىعان ەل گەرمانيادا دا مۇنداي مۇمكىندىك جوق ازىرگە. ۋاقىت ايىرماشىلىعىنا بايلانىستى قازاقستان بەلگيادان دا بۇرىن ىسكە قوستى. سەبەبى،  ولاردا دا جاڭا سەرۆيستىڭ پرەزەنتاتسياسى بۇگىنگە جوسپارلانعان", - دەدى ول.

سونداي-اق، Halyk Bank پەن  Qazkom كارتالارىن قولدانۋشىلار ءۇشىن بانك  Starbucks, Marrone Rosso, Angel-In-Us سەكىلدى كافەلەرىندە Apple Pay ارقىلى تولەگەن جاعدايدا  5% Go!  بونۋسىن ۇسىنادى. باسقارما توراعاسى ورىنباسارىنىڭ ايتۋىنشا، بۇل ءتىزىم ءالى دە كوبەيەدى. بۇل تەك بۇگىنگە دەيىن سەرىكتەس بوپ ۇلگەرگەن كومپانيالاردىڭ قاتارى. سونىمەن بىرگە، جۇيەگە قوسىلعان كەزدە دە اتالعان  كارتا يەلەرى  500 Go! بونۋسىنا يە بولادى.

Apple Pay قىزمەتىن ىسكە قوسۋ وڭاي. كليەنتتەر Halyk Bank پەن  Qazkom-نىڭ Mastercard جانە Visa كارتاسىن  Homebank نەمەسە Wallet اپپتارى ارقىلى تولەم قىزمەتىنە قوسا الادى. دۇكەندەردە Apple Pay ارقىلى تولەم جۇرگىزۋ ءۇشىن ايفون تەلەفونىنىڭ بارلىق سوڭعى ۇلگىلەرى مەن Apple Watch - ءتى قولدانۋعا بولادى.

"The Qazaq Times"