AQŞ prezidenti Donal'd Tramp jurnalisterdi qabıldağan kezde saud arabiyalıq jurnalistiñ joğaluına baylanıstı pikirin bildirdi.  Washington Post basılımınıñ tilşisi Saud Arabiyasına qarata Aq üy basşısınıñ qatañ äreketterge barmay otırğanın ayttı. Tramp onıñ sözine jauap berip,  Qwrama Ştattıñ bwl iste Saud Arabiyasın qorğaştan otırmağanın, isti anıqtauğa tırısıp jatqanın bildirdi.

Saud Arabiyası AQŞ-tıñ mañızdı odaqtası bolıp sanaladı. Sondıqtan, Haşoggidiñ joğaluı Aq üy biligin ırıqsız küyde qaldırıp qoydı.

Tramptıñ aytuınşa, AQŞ tarabı Haşoggidiñ Stambuldağı Saud Arabiyasınıñ elşiliginde joğalğanı turalı video nemese audio jazbalardı bölisu turalı Türkiyağa ötiniş bildirgen. «Men bar bolğanı ne bolğanın bilgim kelip otır. Eger dälel bolsa bizge körsetuin swradıq. Biraq onıñ bar ekenine közim jebey otır», – dedi AQŞ prezidenti.

Tramp öziniñ Türkiya saparınan oralğan memlekettik hatşısı Pompeodan mälimet kütip otırğanın da aytıp ötti. Äri, istiñ män-jayın apta soñına deyin anıqtalatınına senim bildirgen.

Degenmen, osığan deyin Tramp Haşoggi isi turalı jurnalisterge bergen pikirlerinde, oqiğanıñ artında «basqa jaqtan kelgen kisi öltiruşiler» twrğan boluı da mümkin ekenin aytqan edi.

Türkiyalıq tergeuşiler Saud Arabiyasınıñ konsulınıñ twrağına barğan. Foto: EPA,

Tekseru isi alğaş bastalğan kezde Türkiya tarabı Haşoggidiñ öltirilgenin anıqtaytın audio jäne video jazbalardıñ bar ekenin aytqan bolatın. Al, türik aqparat qwraldarı bolsa, saud arabiyalıq jurnalistiñ ömiriniñ aqırğı minuttarında qatıstı  qorqınıştı mälimetterdi jazuda. Aytalıq, Türkiyadağı Yeni Safak basılımı: «Audio jazbadan Saud Arabiyasınıñ elşisi äl-Uteybinniñ üni tanıldı», – dep jazdı. Atalğan basılımnıñ aytuınşa audioda: «Sırtqa barıp isteñder, mağan äñgime tauıp berip jatsıñdar», – degen sözder bolğan.

Saud Arabiyasınıñ Stambuldağı konsuldığı. Foto: EPA.

Mwhammed äl-Uteybi seysenbi küni eline qaytıp ketti. Sol küni keşte türik tergeuşileri, prokuratura ökilderi jäne sottıñ medicinalıq ekspertterimen birge Saud Arabiyasınıñ elşiligine jaqın ornalasqan äl-Utebidiñ twrğına barğan.

Türkiya policiyasınıñ mälimdeuinşe, Haşoggi joğalğan küni eki sağattan keyin elşilik pen rezidenciya arasında Saud Arabiyasınıñ diplomatiyalıq nömerindegi kölikter kamerağa tüsip qalğan. Türkiyanıñ policiya tarauları Jamal Haşoggidi 15 adamnan twratın saud arabiyalıq agentter tobı öltirgen degen mälimdemesinde berik twr. Al, Er-Riyad tarabı jurnalistti aman esen elşilikten şığarıp tastağanın aytadı.

Mälimetterge qarağanda, Jamal Haşoggi konsuldıqqa dokumentterin alu barğan. Ol bwrın Saud Arabiyasında qızmetter atqarğan. Keyin öz erkimen AQŞ-qa qonıs audarğan.

Mayk Pompeo Saud patşalığınıñ taq mwragerimen kezdesti. Foto: AFP/BBC,

Al, Mayk Pompeo Er-Riyad saparınan keyingi mälimdemesinde, Saud patşalığınıñ liderleri Türkiyadağı elşilikte 2 qazanda bolğan oqiğa turalı anıq bilmeytini, jiti tekseruge uäde bergenin mälimdegen. Euroodaq elderi de tekserudiñ aşıq-jariya türde ötuin talap etude.

“The Qazaq Times”