Foto: EPA

BWW-nıñ mälimeti boyınşa, Saud-Arabiyası tarapınan Yemenge jasalğan eki äue şabuılınıñ saldarınan kem degende 26 bala qaza tapqan.  «AFP» agenttiginiñ habarlauınşa, köterilisşi-hüsitterdiñ baqılauındağı Hodeyda qalasınıñ oñtüstigindegi Äd-Durayha audanındağı bombalau kezinde tört äyel men 22 bala qaza tapqan.

Sonımen qatar, Äd-Durayhadağı äue şabuıl kezinde tağı tört bala köz jwmğan. «Bir aptanıñ işinde eki ret äue şabuılın jasağan Saud-Arabiyasınıñ basqaruındağı odaq azamattıq twrğındardı da qwrban etti», - dep mälimdegen BWW-nıñ gumanitarlıq kömek jönindegi bas hatşısınıñ kömekşisi Mark Loukok. Onıñ sözinşe, BWW Yemende üş jıldan beri jalğasıp kele jatqan azamattıq twrğındarğa qarsı şabuıldı «täuelsiz türde, jan-jaqtı äri öte tez zertteuge» şaqıradı. Bärimizge belgili, 22 tamızda Saud-Arabiyasınıñ jetekşiligindegi odaqtıq küşter Yemenniñ soltüstik-batısındağı köterilisşiler twratın audanğa äue şabuılın wyımdastırğan edi. Hüsitterdiñ baqılauındağı aqparat közderiniñ mälimetinşe, osı şabuıldıñ kesirinen 30 adam qaza tapqan, onıñ 22-si balalar.

Negizinde, Saud-Arabiyası, BAÄ jäne olardıñ sünnittik odaqtastarı üş jıldan beri Yemende Irannıñ qoldauına ie köterilisşi-hüsitterge qarsı küresip keledi. Hüsitter el astanası Sanamen qosa, Yemenniñ soltüstigin de baqılauda.

“The Qazaq Times”