فوتو: EPA

بۇۇ-نىڭ مالىمەتى بويىنشا، ساۋد-ارابياسى تاراپىنان يەمەنگە جاسالعان ەكى اۋە شابۋىلىنىڭ سالدارىنان كەم دەگەندە 26 بالا قازا تاپقان.  «AFP» اگەنتتىگىنىڭ حابارلاۋىنشا، كوتەرىلىسشى-حۇسيتتەردىڭ باقىلاۋىنداعى حودەيدا قالاسىنىڭ وڭتۇستىگىندەگى ءاد-دۋرايحا اۋدانىنداعى بومبالاۋ كەزىندە ءتورت ايەل مەن 22 بالا قازا تاپقان.

سونىمەن قاتار، ءاد-دۋرايحاداعى اۋە شابۋىل كەزىندە تاعى ءتورت بالا كوز جۇمعان. «ءبىر اپتانىڭ ىشىندە ەكى رەت اۋە شابۋىلىن جاساعان ساۋد-ارابياسىنىڭ باسقارۋىنداعى وداق ازاماتتىق تۇرعىنداردى دا قۇربان ەتتى»، - دەپ مالىمدەگەن بۇۇ-نىڭ گۋمانيتارلىق كومەك جونىندەگى باس حاتشىسىنىڭ كومەكشىسى مارك لوۋكوك. ونىڭ سوزىنشە، بۇۇ يەمەندە ءۇش جىلدان بەرى جالعاسىپ كەلە جاتقان ازاماتتىق تۇرعىندارعا قارسى شابۋىلدى «تاۋەلسىز تۇردە، جان-جاقتى ءارى وتە تەز زەرتتەۋگە» شاقىرادى. بارىمىزگە بەلگىلى، 22 تامىزدا ساۋد-ارابياسىنىڭ جەتەكشىلىگىندەگى وداقتىق كۇشتەر يەمەننىڭ سولتۇستىك-باتىسىنداعى كوتەرىلىسشىلەر تۇراتىن اۋدانعا اۋە شابۋىلىن ۇيىمداستىرعان ەدى. حۇسيتتەردىڭ باقىلاۋىنداعى اقپارات كوزدەرىنىڭ مالىمەتىنشە، وسى شابۋىلدىڭ كەسىرىنەن 30 ادام قازا تاپقان، ونىڭ 22-ءسى بالالار.

نەگىزىندە، ساۋد-ارابياسى، ءباا جانە ولاردىڭ سۇننيتتىك وداقتاستارى ءۇش جىلدان بەرى يەمەندە يراننىڭ قولداۋىنا يە كوتەرىلىسشى-حۇسيتتەرگە قارسى كۇرەسىپ كەلەدى. حۇسيتتەر ەل استاناسى سانامەن قوسا، يەمەننىڭ سولتۇستىگىن دە باقىلاۋدا.

“The Qazaq Times”