Tramp Brennannıñ qwqığın şektedi. Foto: YourNewsWire.com.

AQŞ prezidenti Donal'd Tramp Ortalıq barlau agenttiginiñ (CIA) bwrınğı basşısı Djon Brennandı qwpiya mälimetterge qol jetkizu qwqığınan maqwrım etti. Aq üy baspasöz hatşısı Sara Sanders mälimdemesinde, Brennannıñ äreketterin ekscentristik äreket dep bağalap, prezident Tramptıñ bwyrığın jurnalister aldında oqıp berdi. Bwl turalı Washington Post basılımı mälimdegen bolatın.

Ortalıq barlau basqarmasınıñ bwrınğı direktorı Djon Brennan. Foto: Reuteres7.

Ortalıq barlau agenttiginiñ bwrınğı basşısı Brennan Tramptıñ Putinmen kezdesuine tübegeyli qarsı twrıp, kezdesuden keyin Aq üy basşısınıñ bwl qadamın auır sınnıñ astına alğan edi. Ol jäne 2016 jılğı prezident saylauında Resey men Tramptıñ jwmıs tobınıñ arasındağı baylanısı bar ekenin däleldeuge bolatının da birneşe ret aytqan.

Brennannıñ Trampqa bağıttağan sındarınıñ soñğısı 14 tamızda boldı. Ol öziniñ Tvitter paraqşasına arnayı Trampqa bağıttalğan pikir jazıp: «Ol tipti tärtiptiñ, qalıptı mämile jasaudıñ jäne ar-namıstıñ  az bolsa da belgisin tanıtudan qaldı», – dep jazdı.

Osı mälimdemeden keyin Tramp: «Atqaruşı biliktiñ jetekşisi jäne bas komandir retinde men, Konstituciya boyınşa, elimizdiñ qwpiya mälimetterin qorğauda ülken jauapkerşiligim bar. Qwpiya mälimetterge kimderdiñ ie boluı da meniñ qwzıretimde. Men Ortalıq Barlau Basqarmasınıñ bwrınğı direktorı Djon Brennandı qwpiya mälimetterge qol jetkizu qwqığınan maqwrım etudi şeştim», – degen bwyrıq şığardı.

Bir sözben aytqanda Tramptı til istigine qadağan birqatar lauazımdılar, barlau qızmetkerleri, bwrınğı qızmetkerler prezidenttiñ qolındağı qwqıqtan tayaqtalıp şıqtı. Brennannıñ isine keler bolsaq, Tramp bwyrığında onıñ qwpiya mälimetterdi sırtqa şığaru nemese sol arqılı aqşa tauıp jatqanı turalı ayıptau sözderi joq. Tek Sara Sanderstiñ auzımen «aqılğa simaytın sözder», «wnamsız jüris-twrıs» degen sekildi jalañ ayıptar tağıldı. Bwnısı közqaraqtı jwrtqa Tramptıñ öz qwqığınan paydalanıp kek aluı bolıp körindi.

Dese de, atalğan şeşimdi Tramp barlau agenttikteriniñ direktorlarımen keñeskennen keyin qabıldağanı da anıq.

Tramptıñ bwl şeşimi jariyalana salısımen AQŞ qoğamında türli pikirler jeldey esti. Bwrınğı mem. hatşı Djon Kerri bolsa, Tramptıñ basqaruı «banan respublikasınıñ» tüzimine wqsap baradı dep kelekeledi. «Tramp özine qarsı kelgenniñ bäriniñ auzın jauıp jatır» degen pikirler de BAQ-ta körinis berdi. Bwl jağday Aq üydiñ atmosferasın astañ-kesteñ küyge tüsirdi.

“The Qazaq Times”