ترامپ پرەزيدەنتتىك قۇقىعىنان پايدالانىپ «كەك الدى»

اقش پرەزيدەنتى دونالد ترامپ ورتالىق بارلاۋ اگەنتتىگىنىڭ (CIA) بۇرىنعى باسشىسى دجون برەنناندى قۇپيا مالىمەتتەرگە قول جەتكىزۋ قۇقىعىنان ماقۇرىم ەتتى. اق ءۇي ءباسپاسوز حاتشىسى سارا ساندەرس مالىمدەمەسىندە، برەنناننىڭ ارەكەتتەرىن ەكستسەنتريستىك ارەكەت دەپ باعالاپ، پرەزيدەنت ترامپتىڭ بۇيرىعىن جۋرناليستەر الدىندا وقىپ بەردى. بۇل تۋرالى Washington Post باسىلىمى مالىمدەگەن بولاتىن.

ورتالىق بارلاۋ باسقارماسىنىڭ بۇرىنعى ديرەكتورى دجون برەننان. فوتو: Reuteres7.

ورتالىق بارلاۋ اگەنتتىگىنىڭ بۇرىنعى باسشىسى برەننان ترامپتىڭ پۋتينمەن كەزدەسۋىنە تۇبەگەيلى قارسى تۇرىپ، كەزدەسۋدەن كەيىن اق ءۇي باسشىسىنىڭ بۇل قادامىن اۋىر سىننىڭ استىنا العان ەدى. ول جانە 2016 جىلعى پرەزيدەنت سايلاۋىندا رەسەي مەن ترامپتىڭ جۇمىس توبىنىڭ اراسىنداعى بايلانىسى بار ەكەنىن دالەلدەۋگە بولاتىنىن دا بىرنەشە رەت ايتقان.

برەنناننىڭ ترامپقا باعىتتاعان سىندارىنىڭ سوڭعىسى 14 تامىزدا بولدى. ول ءوزىنىڭ تۆيتتەر پاراقشاسىنا ارنايى ترامپقا باعىتتالعان پىكىر جازىپ: «ول ءتىپتى ءتارتىپتىڭ، قالىپتى مامىلە جاساۋدىڭ جانە ار-نامىستىڭ  از بولسا دا بەلگىسىن تانىتۋدان قالدى»، – دەپ جازدى.

وسى مالىمدەمەدەن كەيىن ترامپ: «اتقارۋشى بيلىكتىڭ جەتەكشىسى جانە باس كوماندير رەتىندە مەن، كونستيتۋتسيا بويىنشا، ەلىمىزدىڭ قۇپيا مالىمەتتەرىن قورعاۋدا ۇلكەن جاۋاپكەرشىلىگىم بار. قۇپيا مالىمەتتەرگە كىمدەردىڭ يە بولۋى دا مەنىڭ قۇزىرەتىمدە. مەن ورتالىق بارلاۋ باسقارماسىنىڭ بۇرىنعى ديرەكتورى دجون برەنناندى قۇپيا مالىمەتتەرگە قول جەتكىزۋ قۇقىعىنان ماقۇرىم ەتۋدى شەشتىم»، – دەگەن بۇيرىق شىعاردى.

ءبىر سوزبەن ايتقاندا ترامپتى ءتىل ىستىگىنە قاداعان بىرقاتار لاۋازىمدىلار، بارلاۋ قىزمەتكەرلەرى، بۇرىنعى قىزمەتكەرلەر پرەزيدەنتتىڭ قولىنداعى قۇقىقتان تاياقتالىپ شىقتى. برەنناننىڭ ىسىنە كەلەر بولساق، ترامپ بۇيرىعىندا ونىڭ قۇپيا مالىمەتتەردى سىرتقا شىعارۋ نەمەسە سول ارقىلى اقشا تاۋىپ جاتقانى تۋرالى ايىپتاۋ سوزدەرى جوق. تەك سارا ساندەرستىڭ اۋزىمەن «اقىلعا سيمايتىن سوزدەر»، «ۇنامسىز ءجۇرىس-تۇرىس» دەگەن سەكىلدى جالاڭ ايىپتار تاعىلدى. بۇنىسى كوزقاراقتى جۇرتقا ترامپتىڭ ءوز قۇقىعىنان پايدالانىپ كەك الۋى بولىپ كورىندى.

دەسە دە، اتالعان شەشىمدى ترامپ بارلاۋ اگەنتتىكتەرىنىڭ ديرەكتورلارىمەن كەڭەسكەننەن كەيىن قابىلداعانى دا انىق.

ترامپتىڭ بۇل شەشىمى جاريالانا سالىسىمەن اقش قوعامىندا ءتۇرلى پىكىرلەر جەلدەي ەستى. بۇرىنعى مەم. حاتشى دجون كەرري بولسا، ترامپتىڭ باسقارۋى «بانان رەسپۋبليكاسىنىڭ» تۇزىمىنە ۇقساپ بارادى دەپ كەلەكەلەدى. «ترامپ وزىنە قارسى كەلگەننىڭ ءبارىنىڭ اۋزىن جاۋىپ جاتىر» دەگەن پىكىرلەر دە باق-تا كورىنىس بەردى. بۇل جاعداي اق ءۇيدىڭ اتموسفەراسىن استاڭ-كەستەڭ كۇيگە ءتۇسىردى.

“The Qazaq Times”