Foto: bbc.com/afrique

BWW Auğanstannıñ Gazni qalasında azıq-tülik qorınıñ tausılğanı turalı eskertip, alañdauşılığın bildirgen. Wyımnıñ alañdauına negiz bolğan närse — strategiyalıq mañızı bar qalada tört künnen beri «Taliban» qozğalısı şabuıl jasauda, - dep habarlaydı Bi-Bi-Si agenttiginiñ francuz qızmeti.

Tälibter şabuıldı 10 tamızda bastağan, saldarınan 100 kommandos qaza tauıp, odan bölek tağı birneşe policiya qızmetkeri oqqa wşqan. Qalanıñ strategiyalıq mañızı bar deytin sebebimiz — ol Kabul men Kandagardıñ arasındağı negizgi jol torabında ornalasqan. Eger tälibter qalanı tolıqtay qolğa alatın bolsa, oñtüstik Auğanstan el astanası Kabuldan bölinbek. Osığan alañdağan el prezidenti Ğani Aşraf Gaznige jiberiletin äskerdiñ sanın arttıruğa bwyrıq bergen. Negizi, el ükimeti Gaznidiñ baqılauda ekenin aytqanmen, «Taliban» qozğalısı ökilderiniñ mälimdemesine qarağanda, qazir olar köp jetisikke jetken, yağni qaladağı ükimettik ğimarattardı basıp alğan. "Qaladağı baylanıs jelileri bwzılıp, ol jaqtan tolıq aqparat alu mümkin bolmauda", - dep habarlanğan agenttik saytında.  Al, qazirgi uaqıtta jedel türde qalanı tärk etuge jantalasqan qala halqı ondağı jağdaydıñ adam tözgisiz ekenin aytqan. Olardıñ sözinşe, tört kün işinde 30  beybit twrğın qaza tauıp, 140 adam jaralanğan. Bi-Bi-Si agenttiginiñ bağalauınşa, Auğanstan ükimeti el territoriyasınıñ tek 30 payızın ğana baqılay aluda, al qalğan aumaqtarda «Taliban» qozğalısı men DAIŞ ökilderi belsendi äreket etude.

“The Qazaq Times”