اۋعانستاندا گازني ءۇشىن كۇرەس جالعاسۋدا: قالادا سۋ مەن ازىق-تۇلىك تاۋسىلعان

بۇۇ اۋعانستاننىڭ گازني قالاسىندا ازىق-تۇلىك قورىنىڭ تاۋسىلعانى تۋرالى ەسكەرتىپ، الاڭداۋشىلىعىن بىلدىرگەن. ۇيىمنىڭ الاڭداۋىنا نەگىز بولعان نارسە — ستراتەگيالىق ماڭىزى بار قالادا ءتورت كۇننەن بەرى «تاليبان» قوزعالىسى شابۋىل جاساۋدا، - دەپ حابارلايدى بي-بي-سي اگەنتتىگىنىڭ فرانتسۋز قىزمەتى.

تالىبتەر شابۋىلدى 10 تامىزدا باستاعان، سالدارىنان 100 كومماندوس قازا تاۋىپ، ودان بولەك تاعى بىرنەشە پوليتسيا قىزمەتكەرى وققا ۇشقان. قالانىڭ ستراتەگيالىق ماڭىزى بار دەيتىن سەبەبىمىز — ول كابۋل مەن كانداگاردىڭ اراسىنداعى نەگىزگى جول تورابىندا ورنالاسقان. ەگەر تالىبتەر قالانى تولىقتاي قولعا الاتىن بولسا، وڭتۇستىك اۋعانستان ەل استاناسى كابۋلدان بولىنبەك. وسىعان الاڭداعان ەل پرەزيدەنتى عاني اشراف گازنيگە جىبەرىلەتىن اسكەردىڭ سانىن ارتتىرۋعا بۇيرىق بەرگەن. نەگىزى، ەل ۇكىمەتى گازنيدىڭ باقىلاۋدا ەكەنىن ايتقانمەن، «تاليبان» قوزعالىسى وكىلدەرىنىڭ مالىمدەمەسىنە قاراعاندا، قازىر ولار كوپ جەتىسىككە جەتكەن، ياعني قالاداعى ۇكىمەتتىك عيماراتتاردى باسىپ العان. "قالاداعى بايلانىس جەلىلەرى بۇزىلىپ، ول جاقتان تولىق اقپارات الۋ مۇمكىن بولماۋدا", - دەپ حابارلانعان اگەنتتىك سايتىندا.  ال، قازىرگى ۋاقىتتا جەدەل تۇردە قالانى تارك ەتۋگە جانتالاسقان قالا حالقى ونداعى جاعدايدىڭ ادام توزگىسىز ەكەنىن ايتقان. ولاردىڭ سوزىنشە، ءتورت كۇن ىشىندە 30  بەيبىت تۇرعىن قازا تاۋىپ، 140 ادام جارالانعان. بي-بي-سي اگەنتتىگىنىڭ باعالاۋىنشا، اۋعانستان ۇكىمەتى ەل تەرريتورياسىنىڭ تەك 30 پايىزىن عانا باقىلاي الۋدا، ال قالعان اۋماقتاردا «تاليبان» قوزعالىسى مەن دايش وكىلدەرى بەلسەندى ارەكەت ەتۋدە.

“The Qazaq Times”