Foto: yeniakit.com

AQŞ pen arab elderine tiesili aqparat qwraldarınıñ habarlauınşa, Amerika prezidenti Donal'd Tramp biligi Orta Şığısta jaña bir äskeri odaq qwruda. Naqtıraq aytsaq, Donal'd Tramp biligi Saud-Arabiyası, Birikken Arab ämirlikteri (BAÄ), Küveyt, Katar, Bahreyn, Mısır jäne Iordaniya elderinen qwralğan jaña bir äskeri odaq qwru jwmıstarın jürgizude. «Arab NATO-sı» dep atalatın odaqtıñ Iranğa qarsı bağıtta jwmıs isteytini de habarlandı. Bwl turalı mälimetti «lanouvellerepublique.fr» iri aqparat agenttigi de rastap, resmi türde bölisti.

Sayasatkerlerdiñ payımdauınşa, bwl jobanıñ maqsatı Irannıñ osı aymaqtağı äskeri jäne sayasi ıqpalına qarsı küresu. Ağılşın habar agenttigi «Reuters»-tiñ habarlauınşa, Iranğa qarsı qwrılıp, astırtın türde jürgizilui josparlanğan osı sayasi jäne qauipsizdik odaq Aq üy men Orta Şığıs elderi arasındağı qanday da bir äskeri jäne sayasi şeşimderge bağıttalğan. AQŞ-qa qarastı odaq Parsı şığanağı elderimen qatar, Mısır men Iordaniyanı da qamtıp, osı elder arasında zımıran qauipsizdigi, äskeri jattığu, terrorizmmen küres sekildi öte auqımdı jobalarğa arnalğan. Arab elderiniñ arasında aymaqtıq ekonomikalıq jäne diplomatikalıq qarım-qatınastardıñ damıtıluı da odaqtıñ bastı közdegeni boluı mümkin.

Osı habarğa qatıstı resmi mälimdeme jasağan Aq üy: «Soñğı birneşe aydan beri aymaqtıq seriktesterimizben jospar qwrudamız. Äri sol josparımızdı jüzege asırudamız» , - dep mälimdeme jasasa, Aq üy Wlttıq qauipsizdik keñesiniñ baspasöz hatşısı: «Atalğan jobamızdıñ maqsatı — Irannıñ äskeri şabuıl äreketterimen, terrorizmmen jäne ekstremizmmen küresip, Ortaşığısta twraqtılıq ornatpaq» - degen.

Iran da tarapı da osı mäselege baylanıstı öz mälimdemesin jasap ülgerdi. «Amerika men aymaqtıq odaqtastarı Orta Şığısta twraqtılıq ornatamız degen jeleumen aymaqtağı şielenisti odan sayın uşıqtıruda» degen. Negizi, bwl josparsız-aq, osı küni Iran men AQŞ ara-qatınasınıñ  şielenisti jağdayğa jetkeni anıq. Endi, sarapşılardıñ pikirinşe, AQŞ Iranğa şabuılın arab elderi arqılı  sınamaqşı.

“The Qazaq Times”