Foto: ca-news.org

2015 jılı bes jılğa bas bostandığınan ayırılğan Gülnär Karimovanıñ Şveycariyadağı advokatı Taşkentke kelu saparı kezinde birtalay şındıqtı jwrtqa jariya etti, - dep habarlaydı «ca-news.org» agenttigi.

Şveycariyalıq «Mangeat Attorneys at Law» advokattıq kontorınıñ negizin saluşı zañger Greguar Manja osı saparında Özbekstannıñ bwrınğı prezidenti Islam Karimovtıñ qızı Gülnär Karimovamen kezdesui mümkin. Özbekstannıñ Bas Prokuraturası bwğan eşqanday kederginiñ joq ekenin mälimdegen. Advokattıñ aytuınşa, qazirgi sätte «Taşkent qalasınan şamamen üş sağattıq jerdegi abaqtıda» jatqan Gülnär Karimovağa qatıstı sottıq ister bilik basına Şafkat Mirziyaev kelgennen beri birşama jeñildegen. Manja Karimovanı «onıñ isindegi şikilikter» şarşatqanın äri alğaşqı eki jarım jılı öte auır ötkenin, sondıqtan da qazirgi uaqıtta densaulığı naşarlap, därilik preparattar qabıldap jatqan Gülnärğa tek prezident Ş.Mirziyaev qana kömektese alatının aytqan.

Eske salayıq, 2017 jıldıñ şilde ayında Özbekstannıñ Bas Prokuraturası Karimovanıñ qılmıstıq isi turalı tolıq mälimet jariyalağan edi. Osı mälimdemelerge qarağanda, 2015 jılı Karimova bopsalau, memlekettik qarjını orınsız jwmsau, salıqtan jaltaru siyaqtı köptegen ayıptaularmen bes jılğa bas bostandığıan ayırılğan edi. Tağı da resmi mälimdemelerge säykes, oğan qarsı özgelerdiñ mülikterin iemdenu, keden zañın, sauda qağidaların bwzu, şeteldik valyutalardı jasıru, kiristerdi zañdastıru jäne jalğan qwjat äzirleu sındı köptegen is qozğalğan. Al, şveycariyalıq advokatınıñ keşe jasağan mälimdemesine säykes, Karimova bwl ayıptaulardıñ eşqaysısımen kelispeydi.

“The Qazaq Times”