گۇلنار كاريموۆانىڭ تاشكەنت تۇبىندەگى تۇرمەدە ەكەنى انىقتالدى

2015 جىلى بەس جىلعا باس بوستاندىعىنان ايىرىلعان گۇلنار كاريموۆانىڭ شۆەيتسارياداعى ادۆوكاتى تاشكەنتكە كەلۋ ساپارى كەزىندە ءبىرتالاي شىندىقتى جۇرتقا جاريا ەتتى، - دەپ حابارلايدى «ca-news.org» اگەنتتىگى.

شۆەيتساريالىق «Mangeat Attorneys at Law» ادۆوكاتتىق كونتورىنىڭ نەگىزىن سالۋشى زاڭگەر گرەگۋار مانجا وسى ساپارىندا وزبەكستاننىڭ بۇرىنعى پرەزيدەنتى يسلام كاريموۆتىڭ قىزى گۇلنار كاريموۆامەن كەزدەسۋى مۇمكىن. وزبەكستاننىڭ باس پروكۋراتۋراسى بۇعان ەشقانداي كەدەرگىنىڭ جوق ەكەنىن مالىمدەگەن. ادۆوكاتتىڭ ايتۋىنشا، قازىرگى ساتتە «تاشكەنت قالاسىنان شامامەن ءۇش ساعاتتىق جەردەگى اباقتىدا» جاتقان گۇلنار كاريموۆاعا قاتىستى سوتتىق ىستەر بيلىك باسىنا شافكات ميرزياەۆ كەلگەننەن بەرى ءبىرشاما جەڭىلدەگەن. مانجا كاريموۆانى «ونىڭ ىسىندەگى شيكىلىكتەر» شارشاتقانىن ءارى العاشقى ەكى جارىم جىلى وتە اۋىر وتكەنىن، سوندىقتان دا قازىرگى ۋاقىتتا دەنساۋلىعى ناشارلاپ، دارىلىك پرەپاراتتار قابىلداپ جاتقان گۇلنارعا تەك پرەزيدەنت ش.ميرزياەۆ قانا كومەكتەسە الاتىنىن ايتقان.

ەسكە سالايىق، 2017 جىلدىڭ شىلدە ايىندا وزبەكستاننىڭ باس پروكۋراتۋراسى كاريموۆانىڭ قىلمىستىق ءىسى تۋرالى تولىق مالىمەت جاريالاعان ەدى. وسى مالىمدەمەلەرگە قاراعاندا، 2015 جىلى كاريموۆا بوپسالاۋ، مەملەكەتتىك قارجىنى ورىنسىز جۇمساۋ، سالىقتان جالتارۋ سياقتى كوپتەگەن ايىپتاۋلارمەن بەس جىلعا باس بوستاندىعىان ايىرىلعان ەدى. تاعى دا رەسمي مالىمدەمەلەرگە سايكەس، وعان قارسى وزگەلەردىڭ مۇلىكتەرىن يەمدەنۋ، كەدەن زاڭىن، ساۋدا قاعيدالارىن بۇزۋ، شەتەلدىك ۆاليۋتالاردى جاسىرۋ، كىرىستەردى زاڭداستىرۋ جانە جالعان قۇجات ازىرلەۋ سىندى كوپتەگەن ءىس قوزعالعان. ال، شۆەيتساريالىق ادۆوكاتىنىڭ كەشە جاساعان مالىمدەمەسىنە سايكەس، كاريموۆا بۇل ايىپتاۋلاردىڭ ەشقايسىسىمەن كەلىسپەيدى.

“The Qazaq Times”