Batıs basılımdarı Erdoğandı sınğa aldı. Foto: VOA News.

Jeksenbi küni Türik Respublikasında prezident saylauı ötpek. Türkiya men Europa elderi arasındağı soñğı kezdegi kirbeñdikterge baylanıstı, Batıs basılımdarı Erdoğan turalı türli sın aytuda. Financial Times basılımı «Erdoğannıñ oyını» attı maqala jariyalap, «Bwl retki saylauda Erdoğan maqsatına jete almay qaluı mümkin» degen boljam jasaydı.

Atalğan maqalada: «Bwğan deyin Erdoğan mwnday älsiz, şarşañqı köringen emes» degen sözder kezdesedi. Sonımen birge, qoğamdıq pikirlerdi zerttegen agenttikterdiñ mälimetine qarağanda, prezident Erdroğan alğaşqı aynalımda jeñiske jete almaydı, ekinşi kezeñde barın saluı mümkin degen boljamdar aytadı.

Birqatar batıstıq basılımdar saylau kezindegi Türkiyağa körşiles elderdegi jağdaydı da köbirek eskeru kerek ekenin aytadı. Irak pen Süriyadağı äskeri qaqtığıstar, Türkiyanıñ AQŞ, EO-men pikir qayşılıqtarı bwnıñ bäri qatañ jağdayda ötip jatqan saylau qorıtındısına öz ıqpalın jasaydı dep qaraydı.

Batıstıq sarapşılardıñ pikirine qarağanda, şeteldegi türkiyalıq saylauşılar men eldegi kürdterdiñ bergen dauısı Erdoğannıñ bilikte qaluı nemese ketuin belgileydi degen közqarastardı ortağa saladı. Tipti keybir sarapşılar, kürdterdi qoldağan Eldik demokratiya partiyası parlamenttik saylauda Erdoğannıñ Ädilet jäne damu partiyasın jeñip şığuı mümkin.

Türkiya ükimetiniñ kürdter köbirek qonıstanğan aymaqta saylau uçaskelerin  özgertu, biriktiru äreketteri qatañ sınğa wşıradı. Ankara tarabı bwnı qauipsizdik üşin jasap jatqandarın, kürd qarulı toptarınıñ şabuıl jasauı mümkin degendi aytadı. Oppoziciya bolsa, bwl äreket dauıs beru qorıtındısın bwrmalau üşin jasaldı dep ayıptadı.

Bwlardan tıs, ükimet tarabınan terrorlıq wyım dep tanılğan Kürd Jwmısşılar partiyasın qoldağan degen ayıppen, Eldik demokratiya partiyasınıñ 9 müşesi qamauğa alındı. Olardıñ biri – prezidenttikke kandidat qatarındağı Selahattin Demirtaş. Stambulda Eldik demokratiya partiyasınıñ jaqtastarı Demirtaştı bosatudı talap etip, şeru de ötkizdi. Boljamğa säykes, Eldik demokratiya partiyasın saylauşılardıñ 10 payızı qoldasa parlamentke ötui mümkin.

“The Qazaq Times”