باتىس باسىلىمدارى ەردوعاندى سىنعا الدى. فوتو: VOA News.

جەكسەنبى كۇنى تۇرىك رەسپۋبليكاسىندا پرەزيدەنت سايلاۋى وتپەك. تۇركيا مەن ەۋروپا ەلدەرى اراسىنداعى سوڭعى كەزدەگى كىربەڭدىكتەرگە بايلانىستى، باتىس باسىلىمدارى ەردوعان تۋرالى ءتۇرلى سىن ايتۋدا. Financial Times باسىلىمى «ەردوعاننىڭ ويىنى» اتتى ماقالا جاريالاپ، «بۇل رەتكى سايلاۋدا ەردوعان ماقساتىنا جەتە الماي قالۋى مۇمكىن» دەگەن بولجام جاسايدى.

اتالعان ماقالادا: «بۇعان دەيىن ەردوعان مۇنداي ءالسىز، شارشاڭقى كورىنگەن ەمەس» دەگەن سوزدەر كەزدەسەدى. سونىمەن بىرگە، قوعامدىق پىكىرلەردى زەرتتەگەن اگەنتتىكتەردىڭ مالىمەتىنە قاراعاندا، پرەزيدەنت ەردروعان العاشقى اينالىمدا جەڭىسكە جەتە المايدى، ەكىنشى كەزەڭدە بارىن سالۋى مۇمكىن دەگەن بولجامدار ايتادى.

بىرقاتار باتىستىق باسىلىمدار سايلاۋ كەزىندەگى تۇركياعا كورشىلەس ەلدەردەگى جاعدايدى دا كوبىرەك ەسكەرۋ كەرەك ەكەنىن ايتادى. يراك پەن سۇرياداعى اسكەري قاقتىعىستار، تۇركيانىڭ اقش، ەو-مەن پىكىر قايشىلىقتارى بۇنىڭ ءبارى قاتاڭ جاعدايدا ءوتىپ جاتقان سايلاۋ قورىتىندىسىنا ءوز ىقپالىن جاسايدى دەپ قارايدى.

باتىستىق ساراپشىلاردىڭ پىكىرىنە قاراعاندا، شەتەلدەگى تۇركيالىق سايلاۋشىلار مەن ەلدەگى كۇردتەردىڭ بەرگەن داۋىسى ەردوعاننىڭ بيلىكتە قالۋى نەمەسە كەتۋىن بەلگىلەيدى دەگەن كوزقاراستاردى ورتاعا سالادى. ءتىپتى كەيبىر ساراپشىلار، كۇردتەردى قولداعان ەلدىك دەموكراتيا پارتياسى پارلامەنتتىك سايلاۋدا ەردوعاننىڭ ادىلەت جانە دامۋ پارتياسىن جەڭىپ شىعۋى مۇمكىن.

تۇركيا ۇكىمەتىنىڭ كۇردتەر كوبىرەك قونىستانعان ايماقتا سايلاۋ ۋچاسكەلەرىن  وزگەرتۋ، بىرىكتىرۋ ارەكەتتەرى قاتاڭ سىنعا ۇشىرادى. انكارا تارابى بۇنى قاۋىپسىزدىك ءۇشىن جاساپ جاتقاندارىن، كۇرد قارۋلى توپتارىنىڭ شابۋىل جاساۋى مۇمكىن دەگەندى ايتادى. وپپوزيتسيا بولسا، بۇل ارەكەت داۋىس بەرۋ قورىتىندىسىن بۇرمالاۋ ءۇشىن جاسالدى دەپ ايىپتادى.

بۇلاردان تىس، ۇكىمەت تارابىنان تەررورلىق ۇيىم دەپ تانىلعان كۇرد جۇمىسشىلار پارتياسىن قولداعان دەگەن ايىپپەن، ەلدىك دەموكراتيا پارتياسىنىڭ 9 مۇشەسى قاماۋعا الىندى. ولاردىڭ ءبىرى – پرەزيدەنتتىككە كانديدات قاتارىنداعى سەلاحاتتين دەميرتاش. ستامبۋلدا ەلدىك دەموكراتيا پارتياسىنىڭ جاقتاستارى دەميرتاشتى بوساتۋدى تالاپ ەتىپ، شەرۋ دە وتكىزدى. بولجامعا سايكەس، ەلدىك دەموكراتيا پارتياسىن سايلاۋشىلاردىڭ 10 پايىزى قولداسا پارلامەنتكە ءوتۋى مۇمكىن.

“The Qazaq Times”