Futbol Älem Çempionatı-2018. Foto; Zee News - India.com.

Bügin keşte Reseyde futboldan Älem Çempionatı bastalmaq. Jer betindegi janküyeri eñ köp sport türi sanalatın ala dop bäsekesine bükil älem köz tigude. Osı twsta Reseymen qarım-qatınası salqındap ketken Europa elderi kezekti Älem Çempionatına türli sın-pikirler aytuda. Äsirese, ağılşın aralındağı aqparat közderi dübirli dodanı är qırınan alıp qarap, dop dodasınan sayasat izdestirude.

Aytalıq, Financial Times basılımı soñğı sandarınıñ birinde: «Resey soñğı janjal, qırğiqabaq qarım-qatınastardan keyin, öz imidjin jaqsartu üşin futbol çempionatın ötkizuge qattı köñil bölude», – dep jazğan. Atalğan basılım jäne: «Üş ay bwrın älem halqı Putindı «düniedegi eñ jekkörinişti lider» qatarında atap keldi. Alayda, bir aydan keyin milliardtağan kisiler Resey prezidentiniñ Älem çempionatınıñ kubogın Messige, Ronalduğa nemese özge bir futbol jwldızına berip jatqanın köretin boldı», – dedi.

Ärine ÄÇ ötkizu, Resey üşin ülken oray bolatını dausız. Älem halqı Reseyge köz tigip otırğan osı sätte Mäskeu biligi özin Batıstıñ ekonomikalıq sankciyasına qarsı tötep bere alğan, sayasi qısımdarına şıdağan, äli de quattı rejim etip körsetuge mümkindik aladı.

Batıs aqparat közderi, Putinniñ futbol jankyeri emes ekenin, hokkey men dzyudoğa köbirek qızığatının da alğa tartıp, dünie çempionına talasu jarıstarınıñ qadır-qımbatın tüsine bermeydi degen sözdermen de soğıp aldı.

Resey älem birinşiligin ötkizu qwqığın wtıp alğannan keyin de, Eurpalıq key elder bwğan baykot jariyalauğa da şaqırıp keldi. Biraq, onısı nätije bermedi. Tipti, Angliya elderi bastap, wlttıq qwramaların Reseydegi jarısqa qatıstırmau turalı da bastama kötergen bolatın. 

Tanımal basılım Daily Telegraph FIFA-nıñ qwpiya qwjattarın aqtarıp otırıp, ÄÇ ötkizuge ötiniş bergen elder arasında Resey terrorlıq şabuıl ıqtimaldığı jäne basqa qauipsizdik talaptarı jağında bağalauşılardıñ jağınan tömen bağa alğanın aytadı. Tipti, tekseru nätijesi boyınşa Reseydegi boljausız qauipterdiñ deñgeyi «Ortaşa» deñgeyden joğarı ekenin de alğa tartadı.

Alayda, osınıñ bärine qaramastan, älem halqınıñ eñ süyikti sportınıñ dübirli jarısı birneşe sağattan keyin bastaladı. Sport keyde sayasatqa bağınğanımen, keyde adam ıntasınıñ küşimen, sayasattı özine bağındıratın kezi de bar. Resey turalı bağalar öz aldına, futbol janküyerleri üşin jarıstıñ özi älde qayda qızıq.

 “The Qazaq Times”