فۋتبولدان الەم چەمپيوناتى باستالار تۇستا باتىستىق باق رەسەيدى سىنعا الۋدا

بۇگىن كەشتە رەسەيدە فۋتبولدان الەم چەمپيوناتى باستالماق. جەر بەتىندەگى جانكۇيەرى ەڭ كوپ سپورت ءتۇرى سانالاتىن الا دوپ باسەكەسىنە بۇكىل الەم كوز تىگۋدە. وسى تۇستا رەسەيمەن قارىم-قاتىناسى سالقىنداپ كەتكەن ەۋروپا ەلدەرى كەزەكتى الەم چەمپيوناتىنا ءتۇرلى سىن-پىكىرلەر ايتۋدا. اسىرەسە، اعىلشىن ارالىنداعى اقپارات كوزدەرى ءدۇبىرلى دودانى ءار قىرىنان الىپ قاراپ، دوپ دوداسىنان ساياسات ىزدەستىرۋدە.

ايتالىق، Financial Times باسىلىمى سوڭعى ساندارىنىڭ بىرىندە: «رەسەي سوڭعى جانجال، قىرعيقاباق قارىم-قاتىناستاردان كەيىن، ءوز ءيميدجىن جاقسارتۋ ءۇشىن فۋتبول چەمپيوناتىن وتكىزۋگە قاتتى كوڭىل بولۋدە»، – دەپ جازعان. اتالعان باسىلىم جانە: «ءۇش اي بۇرىن الەم حالقى پۋتيندى «دۇنيەدەگى ەڭ جەككورىنىشتى ليدەر» قاتارىندا اتاپ كەلدى. الايدا، ءبىر ايدان كەيىن ميللياردتاعان كىسىلەر رەسەي پرەزيدەنتىنىڭ الەم چەمپيوناتىنىڭ كۋبوگىن مەسسيگە، رونالدۋعا نەمەسە وزگە ءبىر فۋتبول جۇلدىزىنا بەرىپ جاتقانىن كورەتىن بولدى»، – دەدى.

ارينە ءاچ وتكىزۋ، رەسەي ءۇشىن ۇلكەن وراي بولاتىنى داۋسىز. الەم حالقى رەسەيگە كوز تىگىپ وتىرعان وسى ساتتە ماسكەۋ بيلىگى ءوزىن باتىستىڭ ەكونوميكالىق سانكتسياسىنا قارسى توتەپ بەرە العان، ساياسي قىسىمدارىنا شىداعان، ءالى دە قۋاتتى رەجيم ەتىپ كورسەتۋگە مۇمكىندىك الادى.

باتىس اقپارات كوزدەرى، ءپۋتيننىڭ فۋتبول جانكيەرى ەمەس ەكەنىن، حوككەي مەن دزيۋدوعا كوبىرەك قىزىعاتىنىن دا العا تارتىپ، دۇنيە چەمپيونىنا تالاسۋ جارىستارىنىڭ قادىر-قىمباتىن تۇسىنە بەرمەيدى دەگەن سوزدەرمەن دە سوعىپ الدى.

رەسەي الەم بىرىنشىلىگىن وتكىزۋ قۇقىعىن ۇتىپ العاننان كەيىن دە، ەۋرپالىق كەي ەلدەر بۇعان بايكوت جاريالاۋعا دا شاقىرىپ كەلدى. بىراق، ونىسى ناتيجە بەرمەدى. ءتىپتى، انگليا ەلدەرى باستاپ، ۇلتتىق قۇرامالارىن رەسەيدەگى جارىسقا قاتىستىرماۋ تۋرالى دا باستاما كوتەرگەن بولاتىن. 

تانىمال باسىلىم Daily Telegraph فيفا-نىڭ قۇپيا قۇجاتتارىن اقتارىپ وتىرىپ، ءاچ وتكىزۋگە ءوتىنىش بەرگەن ەلدەر اراسىندا رەسەي تەررورلىق شابۋىل ىقتيمالدىعى جانە باسقا قاۋىپسىزدىك تالاپتارى جاعىندا باعالاۋشىلاردىڭ جاعىنان تومەن باعا العانىن ايتادى. ءتىپتى، تەكسەرۋ ناتيجەسى بويىنشا رەسەيدەگى بولجاۋسىز قاۋىپتەردىڭ دەڭگەيى «ورتاشا» دەڭگەيدەن جوعارى ەكەنىن دە العا تارتادى.

الايدا، وسىنىڭ بارىنە قاراماستان، الەم حالقىنىڭ ەڭ سۇيىكتى سپورتىنىڭ ءدۇبىرلى جارىسى بىرنەشە ساعاتتان كەيىن باستالادى. سپورت كەيدە ساياساتقا باعىنعانىمەن، كەيدە ادام ىنتاسىنىڭ كۇشىمەن، ساياساتتى وزىنە باعىندىراتىن كەزى دە بار. رەسەي تۋرالى باعالار ءوز الدىنا، فۋتبول جانكۇيەرلەرى ءۇشىن جارىستىڭ ءوزى الدە قايدا قىزىق.

 “The Qazaq Times”