Foto: Körneki suret

Avstriya ükimeti özge memleketter tarapınan qarjılandırılatın meşitterdi jauıp, imamdardı el territoriyasınan ketiruge şeşim şığarğan. Atalğan şeşimge säykes, «Avstriyadağı mädeni jäne äleumettik ıntımaqtastıq ayasındağı türik-islam odağı» qoldau körsetetin meşitter men qwrılımdar da jwmısın toqtatadı. Bwl turalı Evron'yus agenttiginiñ «fr.euronews.com» francuz qızmeti habarlaydı.  

Atalğan odaq qwramında 60 qauım men 100 mıñnan astam adam bar körinedi. Avstriya biligi osı qwrılımdar men onıñ müşelerine "türik wltşıldığın taratuda" degen kinä artadı. "El astanasında ornalasqan «Kök böri» dep atalatın meşitten bastap, osı bağıttağı barlıq meşitti jabudı qolğa alamız", - dep habarlağan ükimettik wyım. Avstriya kancleri Sebast'yan Kurc osı şeşimderdiñ Avstriyanıñ Islam Dini Qauimdastığımen aqıldasıp jasalıp jatqanın mälimdegen.

Avstriya İşki ister ministri Gerbert Kikla da: "Osı äreketter "Avstriyadağı qanday da bir wyımdar men qwrılımdardıñ şet elder tarapınan qarjılandırıluına tıyım salınuı" turalı zañ negizinde jüzege asırıluda", - dep habarlağan.

Eske salayıq, 2017 jılı «Avstriyadağı mädeni jäne äleumettik ıntımaqtastıq ayasındağı türik-islam odağı» avstriyalıq ükimet tarapınan qatal sınğa wşırağan edi. Mäseleniñ uşığuına mwsılmandardıñ balabaqşaları sebep boldı. Avstriya SİM «osı balabaqşalar Avstriyanıñ salt-dästürleriniñ ornına islam qwndılıqtarın taratumen aynalısadı», dep mälimdegen edi.

Türkiya tarapı bwğan ne deydi?

Sarapşılar istiñ aq-qarasınıñ äli anıqtalatının aytıp, Avstriya ükimetiniñ däl osı qasietti Ramazan ayında meşitterdiñ jwmısın toqtatuı negizsiz boldı degen pikirde. Al, türkiyalıq «timeturk.com» aqparat qwralı Türkiya biliginiñ Avstriya ükimetiniñ «türik wltşıldığın taratuda» degen ayıptauına baylanıstı odan naqtı dälel men mälimdeme kütetinin habarladı.

Sonday-aq, Türkiya prezidenti Rejep Tayıp Erdoğannıñ resmi ökili Ibragim Kalın Avstriya biliginiñ osı şeşimin «islamofobiya men näsilşildik» dep atadı. «Meşitterdi jabu — Avstriyadağı näsilşildik pen kemsituşiliktiñ körinisi. Äri, islam dinine degen qarsılıqtıñ  nätijesi. Avstriya ükimetiniñ osı şeşimdi qabıldaudağı bastı közdegeni — sayasi paydağa qol jetkizu üşin mwsılman jamağattarın marginaldandıru», - dedi I.Kalın.

“The Qazaq Times”