Aqıt şığarmaşılığına arnalğan ğılımi konferenciya. Foto: QT.

Bügin, Almatı qalasındağı Ğılım ordasında Aqıt qajı Wlımjıwlınıñ şığarmaşılığına arnalğan ğılımi konferenciya ötti. «Ruhani jañğıru jäne Aqıt Wlımjıwlınıñ şığarmaşılıq mwrası» attı şaranı M. O. Äuezov atındağı Ädebiet jäne öner institutı men TÜRKSOY halıqaralıq wyımı qazaqtıñ ğwlama aqını, Şınjañdağı qazaq ädebietiniñ negizin qalauşılardıñ biri Aqıt qajınıñ tuılğanına 150 jıl toluına oray wyımdastırğan.

Aqıt qajı Wlımjıwlınıñ şığarmaşılığı "Ruhani jaañğıru" ideyasına baylanıstırıla talqılandı. Foto: M.Äuezov atındağı Ädebiet jäne öner institutı.

Konferenciyanıñ bastı maqsatı – Aqıt Wlımjıwlınıñ ömiri men şığarmaşılıq mwrasın nasihattau, zertteu jäne aqıttanudıñ özekti mäseleleri men «Ruhani jañğıru» ideyalarımen sabaqtastıra talqılau.

Ğılımi talqıda «TÜRKSOY» halıqaralıq wyımnıñ bas hatşısı Düysen Qaseyinov, Qazaqstannıñ halıq jazuşısı Qabdeş Jümädilov, Qazaqstan Jazuşılar odağınıñ basqarma törağası, f.ğ.d, professor Bauırjan Jaqıp jäne birqatar tarihşı, dintanuşı, ädebiet zertteuşileri Aqıt şığarmaşılığı turalı bayandama jasadı.

Aqın Bauırjan Jaqıp öz sözinde Aqıt qajınıñ qazaq tarihında alğaş Qazan baspasınan kitap şığarğanı turalı ayta kelip, Jazuşılar odağında Şeteldegi qazaq ädebieti keñesi Aqıt şığarmaşılığın zertteu, nasihattaudı josparğa engizgenin, «Ädebiet» baspası Aqıttıñ bir tomdığın şığarudı ministrlikke wsınğan, aldağı uaqıtta Jazuşılar odağında da Aqıt qajığa arnalğan keş ötetinin jetkizdi.

Qazaqstan Jazuşılar odağınıñ basqarma törağası B. Jaqıp Aqıt şığarmaşılığı turalı söz söyledi. Foto: M. Äuezov atındağı Ädebiet jäne öner institutı. FB paraqşasınan.

Bauırjan Ömirjanwlı söziniñ soñında: «Ädebiet» baspası Aqıttıñ bir tomdığın şığarudı wsındı, al zertteuşilerdiñ aytuınşa Aqıt eñbeginen 5-6 tom kitap qalğan. Bwnıñ bärin jinastırıp şığaru bizdiñ parızımız dep oylaymın. Aqıttıñ 150 jıldığın joğarı deñgeyde atap ötu kerek-aq. Biıl, birqatar wlı twlğalardıñ merey toyı – Şäkerim qajınıñ 160 jılı, Aqıttıñ 150 jılı, Mağjannıñ 125 jıldığı. Sondıqtan bügin Aqıttıñ şığarmaşılığına arnalğan konferenciya meni quantıp otır, qwttı bolsın! Ruhı barşañızğa jar bolsın!» – dep tüyindedi.

“The Qazaq Times”