عۇلاما اقىت قاجىنىڭ شىعارماشىلىعىنا ارنالعان عىلىمي كونفەرەنتسيا ءوتتى

بۇگىن، الماتى قالاسىنداعى عىلىم ورداسىندا اقىت قاجى ۇلىمجىۇلىنىڭ شىعارماشىلىعىنا ارنالعان عىلىمي كونفەرەنتسيا ءوتتى. «رۋحاني جاڭعىرۋ جانە اقىت ۇلىمجىۇلىنىڭ شىعارماشىلىق مۇراسى» اتتى شارانى م. و. اۋەزوۆ اتىنداعى ادەبيەت جانە ونەر ينستيتۋتى مەن TÜRKSOY حالىقارالىق ۇيىمى قازاقتىڭ عۇلاما اقىنى، شىنجاڭداعى قازاق ادەبيەتىنىڭ نەگىزىن قالاۋشىلاردىڭ ءبىرى اقىت قاجىنىڭ تۋىلعانىنا 150 جىل تولۋىنا وراي ۇيىمداستىرعان.

اقىت قاجى ۇلىمجىۇلىنىڭ شىعارماشىلىعى "رۋحاني جااڭعىرۋ" يدەياسىنا بايلانىستىرىلا تالقىلاندى. فوتو: م.اۋەزوۆ اتىنداعى ادەبيەت جانە ونەر ينستيتۋتى.

كونفەرەنتسيانىڭ باستى ماقساتى – اقىت ۇلىمجىۇلىنىڭ ءومىرى مەن شىعارماشىلىق مۇراسىن ناسيحاتتاۋ، زەرتتەۋ جانە اقىتتانۋدىڭ وزەكتى ماسەلەلەرى مەن «رۋحاني جاڭعىرۋ» يدەيالارىمەن ساباقتاستىرا تالقىلاۋ.

عىلىمي تالقىدا «تۇركسوي» حالىقارالىق ۇيىمنىڭ باس حاتشىسى دۇيسەن قاسەيىنوۆ، قازاقستاننىڭ حالىق جازۋشىسى قابدەش ءجۇمادىلوۆ، قازاقستان جازۋشىلار وداعىنىڭ باسقارما توراعاسى، ف.ع.د، پروفەسسور باۋىرجان جاقىپ جانە بىرقاتار تاريحشى، ءدىنتانۋشى، ادەبيەت زەرتتەۋشىلەرى اقىت شىعارماشىلىعى تۋرالى بايانداما جاسادى.

اقىن باۋىرجان جاقىپ ءوز سوزىندە اقىت قاجىنىڭ قازاق تاريحىندا العاش قازان باسپاسىنان كىتاپ شىعارعانى تۋرالى ايتا كەلىپ، جازۋشىلار وداعىندا شەتەلدەگى قازاق ادەبيەتى كەڭەسى اقىت شىعارماشىلىعىن زەرتتەۋ، ناسيحاتتاۋدى جوسپارعا ەنگىزگەنىن، «ادەبيەت» باسپاسى اقىتتىڭ ءبىر تومدىعىن شىعارۋدى مينيسترلىككە ۇسىنعان، الداعى ۋاقىتتا جازۋشىلار وداعىندا دا اقىت قاجىعا ارنالعان كەش وتەتىنىن جەتكىزدى.

قازاقستان جازۋشىلار وداعىنىڭ باسقارما توراعاسى ب. جاقىپ اقىت شىعارماشىلىعى تۋرالى ءسوز سويلەدى. فوتو: م. اۋەزوۆ اتىنداعى ادەبيەت جانە ونەر ينستيتۋتى. فب پاراقشاسىنان.

باۋىرجان ءومىرجانۇلى ءسوزىنىڭ سوڭىندا: «ادەبيەت» باسپاسى اقىتتىڭ ءبىر تومدىعىن شىعارۋدى ۇسىندى، ال زەرتتەۋشىلەردىڭ ايتۋىنشا اقىت ەڭبەگىنەن 5-6 توم كىتاپ قالعان. بۇنىڭ ءبارىن جيناستىرىپ شىعارۋ ءبىزدىڭ پارىزىمىز دەپ ويلايمىن. اقىتتىڭ 150 جىلدىعىن جوعارى دەڭگەيدە اتاپ ءوتۋ كەرەك-اق. بيىل، بىرقاتار ۇلى تۇلعالاردىڭ مەرەي تويى – شاكەرىم قاجىنىڭ 160 جىلى، اقىتتىڭ 150 جىلى، ماعجاننىڭ 125 جىلدىعى. سوندىقتان بۇگىن اقىتتىڭ شىعارماشىلىعىنا ارنالعان كونفەرەنتسيا مەنى قۋانتىپ وتىر، قۇتتى بولسىن! رۋحى بارشاڭىزعا جار بولسىن!» – دەپ تۇيىندەدى.

“The Qazaq Times”