AQŞ ükimeti 4 mausım oqiğasın eske aldı. Foto: Fox NEWS7.

AQŞ memlekettik hatşısı Pompeo Qıtay astanası Beyjiñ qalasında bolğan «4 mausım oqiğasınıñ» 29 jıl toluına oray arnayı mälimdeme jasadı. Bwl mälimdeme kürdelilene tüsken AQŞ-Qıtay qayşılığın jaña deñgeyge jetkizui mümkin. Bwl turalı Qwrama Ştattardıñ tanımal BAQ-tarı habarladı.

AQŞ Memlekettik departamentiniñ mälimdemesinde: «1989 jılı 4 mausım küni Tyan-Anmın (Tyan'an'men') alañında jäne sonıñ mañında beybit şeru küşpen basıp janıştaldı. Osı oqiğağa 29 jıl uaqıt ötti. Biz jazıqsız adamdardıñ qırğınğa wşırağan osı oqiğanı eske alamız», – delingen.

AQŞ Memlekettik hatşısı Pompeo mälimdeme jasadı. Foto: VOA.

1989 jılı Beyjiñdegi demonstraciyağa qatısqanı üşin Qıtay ükimetiniñ quğın-sürginine wşırağan Lyu Şyaubo, 2010 jılı Nobel' beybitşilik sıylığınıñ saltanattı räsiminde söz söylep: «6.4-tiñ ruhı äli ölgen joq», – degen bolatın.

Pompeo mälimdemesinde: «Biz halıqaralıq qauımdastıqpen jäne özge adamdarmen birge Qıtay ükimetinen qaza bolğan adamdardı jariya etuge şaqıramız. Alañğa şıqqanı üşin sottalğandardı bosatu, aqtaudı swraymız. Demonstrattardıñ jäne otbası müşeleriniñ qudalanuın toqtatudı talap etemiz», – dedi.

Pompeo söziniñ soñında: «Amerika Qwrama Ştatı adam qwqıqtarın qorğau barlıq elderdiñ jauapkerşiligi dep qaraydı. Biz Qıtay ükimetinen azamattardıñ jalpığa birdey qwqıqtarı men negizgi bostandıqtarına qwrmet etudi talap etemiz», – dedi.

Kommunistik Qıtay rejimi 1989 jılğı bwl oqiğanı, ol turalı aytılğan işki-sırtqı ayıptardıñ bärin şetke qağıp keledi. AQŞ departamenti jağınan aytılğan bwl eskertu Qıtay ükimetiniñ eñ jandı jerine tigeni anıq. Bwl eki el qayşılığın odan arman arttıra tüsedi jäne bügingi QHR jerinde bolıp jatqan adam qwqıqtarı mäselesinde Beyjiñ biligin ırıqsız orınğa iteredi.

“The Qazaq Times”