![](https://qazaqtimes.com/kk/content/uploads/2018/06/4EC340F9-C9B9-41AD-88C8-FEF47287B4CF_cx0_cy6_cw0_w1023_r1_s-800x480.jpg?token=b1ad0a42b40c22c732a4614a5c7dcece)
اقش مەملەكەتتىك حاتشىسى پومپەو قىتاي استاناسى بەيجىڭ قالاسىندا بولعان «4 ماۋسىم وقيعاسىنىڭ» 29 جىل تولۋىنا وراي ارنايى مالىمدەمە جاسادى. بۇل مالىمدەمە كۇردەلىلەنە تۇسكەن اقش-قىتاي قايشىلىعىن جاڭا دەڭگەيگە جەتكىزۋى مۇمكىن. بۇل تۋرالى قۇراما شتاتتاردىڭ تانىمال باق-تارى حابارلادى.
اقش مەملەكەتتىك دەپارتامەنتىنىڭ مالىمدەمەسىندە: «1989 جىلى 4 ماۋسىم كۇنى تيان-انمىن (تيانانمەن) الاڭىندا جانە سونىڭ ماڭىندا بەيبىت شەرۋ كۇشپەن باسىپ جانىشتالدى. وسى وقيعاعا 29 جىل ۋاقىت ءوتتى. ءبىز جازىقسىز ادامداردىڭ قىرعىنعا ۇشىراعان وسى وقيعانى ەسكە الامىز»، – دەلىنگەن.
![](http://qazaqtimes.com/content/uploads/2018/06/495DA390-4F03-4BC9-AA34-09300F7A8838_w650_r0_s.jpg)
اقش مەملەكەتتىك حاتشىسى پومپەو مالىمدەمە جاسادى. فوتو: VOA.
1989 جىلى بەيجىڭدەگى دەمونستراتسياعا قاتىسقانى ءۇشىن قىتاي ۇكىمەتىنىڭ قۋعىن-سۇرگىنىنە ۇشىراعان ليۋ شياۋبو، 2010 جىلى نوبەل بەيبىتشىلىك سىيلىعىنىڭ سالتاناتتى راسىمىندە ءسوز سويلەپ: «6.4-ءتىڭ رۋحى ءالى ولگەن جوق»، – دەگەن بولاتىن.
پومپەو مالىمدەمەسىندە: «ءبىز حالىقارالىق قاۋىمداستىقپەن جانە وزگە ادامدارمەن بىرگە قىتاي ۇكىمەتىنەن قازا بولعان ادامداردى جاريا ەتۋگە شاقىرامىز. الاڭعا شىققانى ءۇشىن سوتتالعانداردى بوساتۋ، اقتاۋدى سۇرايمىز. دەمونستراتتاردىڭ جانە وتباسى مۇشەلەرىنىڭ قۋدالانۋىن توقتاتۋدى تالاپ ەتەمىز»، – دەدى.
پومپەو ءسوزىنىڭ سوڭىندا: «امەريكا قۇراما شتاتى ادام قۇقىقتارىن قورعاۋ بارلىق ەلدەردىڭ جاۋاپكەرشىلىگى دەپ قارايدى. ءبىز قىتاي ۇكىمەتىنەن ازاماتتاردىڭ جالپىعا بىردەي قۇقىقتارى مەن نەگىزگى بوستاندىقتارىنا قۇرمەت ەتۋدى تالاپ ەتەمىز»، – دەدى.
كوممۋنيستىك قىتاي رەجيمى 1989 جىلعى بۇل وقيعانى، ول تۋرالى ايتىلعان ىشكى-سىرتقى ايىپتاردىڭ ءبارىن شەتكە قاعىپ كەلەدى. اقش دەپارتامەنتى جاعىنان ايتىلعان بۇل ەسكەرتۋ قىتاي ۇكىمەتىنىڭ ەڭ جاندى جەرىنە تيگەنى انىق. بۇل ەكى ەل قايشىلىعىن ودان ارمان ارتتىرا تۇسەدى جانە بۇگىنگى قحر جەرىندە بولىپ جاتقان ادام قۇقىقتارى ماسەلەسىندە بەيجىڭ بيلىگىن ىرىقسىز ورىنعا يتەرەدى.