Armeniyadağı ereuil. Foto: Kavkaz Post.

Armeniyanıñ biliktegi Respublika partiyası prem'er-ministr lauazımına oppoziciyanıñ kandidatın qoldaytının bildirgennen keyin, oppoziciyalıq sayasatker Nikol Paşinyan jalpı wlttıq narazılıq şerulerin toqtatqan edi. Seysenbi küngi söylesulerde Respublika partiyası öziniñ Paşinyanğa qarsılas kandidatın körsetpegenimen, onıñ prem'er-ministrlikke degen kandidaturasın moyındamay qoydı. Ondağı Respublika partiyasınıñ körsetken sebebi: Paşinyan elde twraqsızdıq ornatqanı sebepti, ol bwl lauazımdı qızmetti atqarıp kete almaydı degen edi.

Armeniya parlamentiniñ 45 deputatı Paşinyannıñ kandidaturasın moyındağan edi. Degenmen, oğan Parlamenttegi 105 deputattıñ keminde 53-i dauıs beru kerek edi. Osı twsta Paşinyan öziniñ kandidaturasın qoldamasa Armeniyanı «sayasi alasapıran» jaylaydı dep eskertken bolatın. Aytqanınday, dauıs beru nätijesinen keyin, elde ükimetke qarsı demonstraciya qayta beleñ alıp, ereuilşiler köşelerdi jauıp, köptegen mektepter sabaq toqtattı. Jwmısşılar da jwmısın toqtatıp, ereuilşilerge qosıldı. Ereuil Armeniyanıñ birneşe qalasında boldı jäne ortalıq qaladağı metro men äuejayğa qatınaytın joldar jabıldı.

Al särsenbi künge kelgende bilik partiyası qaytalay mälimdeme jasap, demonstranttardıñ kandidattarın qoldaytının jetkizdi, biraq Paşinyannıñ esimin atamadı jäne öziniñ kandidatın da wsınğan joq. Mine bwlar Armeniyada osı aptada bolğan jaytter.

Endi ne boluı mümkin?

Armeniya parlamenti 8 mamırda qaytalay jinalıs aşıp, prem'er-ministrdi qayta saylauğa ärekettenbek. Atalğan eldiñ Ata zañı (Konstituciyası) boyınşa Parlament jeti künniñ işinde ekinşi ret prem'er-ministr saylay aladı. Bwl jolı da saylay almasa parlament taraydı.

Al oppoziciya basşısı Paşinyan bügin uaqıtşa prem'er-ministrlikke öziniñ kandidaturasın resmi türde wsındı. Ol bwl turalı mälimdemesinde qosa: «Men aşıq aytayın, bwl jerde halıq Nikol Paşinyandı prem'er-ministrlikke saylauğa jinalğan joq. Olar öz qwqıqtarı jäne demokratiya qwndılıqtarı üşin küresti. Demek olar şarşamaydı, şaldıqpaydı!», – dedi.

Narazılıq şeruiniñ belsendileri kimder?

Ereuildiñ jetekşisi – 42 jastağı Nikol Paşinyan. Bwrın jurnalist bolğan, sayasatqa aralasqanına 20 jılğa juıqtağan.  Aşığın aytu kerek, beybit şeruler Armeniya tarihındağı asa eleuli oqiğalardıñ biri bolıp qaldı. Paşinyan narazılıq akciyasın 31 naurız küni Gyuri qalasında bastağan kezde jaqtastarınıñ sanı nebarı on neşe adam boldı jäne onıñ basım köbi jurnalister edi. Biraq ereuil 13 säuir küni Erevan qalasına jetkende oğan neşe mıñdağan jaqtastarı qosılıp, Armeniya tarihındağı iri oqiğa orın aldı. Şeruge mektep oquşılarınan tartıp, meyramhana dayaşılarına deyin qatıstı. Mektep oquşıları bilim salasın reformalau kerek ekenin aytsa, alıs auıldan kelgen twrğındar: «Bilik bizdiñ bar ekenmizdi osı jolı ğana bildi», – desti. Ärine, Armeniyada bwğan deyin de birneşe ret narazılıq şeruler bolğan, biraq olar naqtı nätije bermegen. Bwl retki demonstraciyanıñ eñ negizgi belsendileri jastar.

«Barqıt revolyuciyasınıñ» barısı

13 säuir küni Nikol Paşilyannıñ 14 künge sozılğan narazılıq akciyası ortalıq qala Erevanğa jetkende onıñ neşe mıñdağan qoldauşıları köşege şıqtı.

17 säuir küni neşe mıñdağan ereuilşilerdiñ äreketine qaramastan parlament 76 dauıstıñ qoldauımen bwrınğı basşı Serj Sargsyannıñ kandidaturasın maqwldadı. 17 ökil qarsı dauıs berdi. Bwdan 8 kün bwrın Sargsyan prezidenttik qızmetinen ketken bolatın.

22 säuir küni Nikol Paşinyan men Serj Sargsyan arasındağı söylesuler üziliske wşırağannan keyin, Paşinyan qamauğa alındı.

23 säuir küin Nikol Paşinyan qamaqtan bosap şıqtı da, Serj Sargsyan qızmetinen ketti.

27 Säuir küni uaqıtşa prem'er-ministr retinde wsınılğan Karen Karapetyan oppoziciya jetekşilerimen söylesuden bas tarttı.

29 säuir küni Respublika partiyası prem'er-ministr kandidatına Nikol Paşinyandı moyındamaytının bildirdi.

1 mamır küni Paşinyan mälimdeme jasap, bilik partiyası onıñ kandidaturasın moyındamasa Armeniyanıñ «sayasi alasapıranğa» tüsetinin aytqanına qaramastan, parlament onı saylamay tastadı. Armeniyalıqtar ereuildi qayta bastadı.

2 mamır küni  bilik partiyası qaytalay mälimdeme jasap, kandidattar tizimine oppoziciya ökilderin qosatının ayttı, alayda Nikol Paşinyannıñ esimi atalmadı. Respublika partiyası öz talapkerlerin de wsınbadı.

Armeniyadağı jağdaydıñ öñirge ıqpalı

Armeniyadağı oqiğalar bwrın Keñes odağınıñ qwramında bolğan memleketterdiñ basşıları üşin alañdaytın jağday. Qazirge deyin, Resey tarabı Armeniyadağı isterge resmi pikir bildirmedi. Reseydiñ bwl elde äskeri bazası bar ekeni belgili jäne Armeniya Putin bastağan Euraziyalıq ekonomikalıq odağına müşe. Mine osı jağdaylardıñ özi 3 millionğa jeter-jetpes halqı bar Armeniyanıñ Mäskeu üşin eleusiz emes ekenin bildiredi.

Ötken jeksenbide Paşinyan Mäskeuge barıp, Resey deputattarımen kezdesti jäne Reseymen bolğan baylanıstardıñ özgermeytinin bildirdi. Armeniyada jemqorlıqqa, eldegi jüyege qarsı küresuşiler köp bolğanımen, sırtqı sayasat, europalıq birlik üşin köşege şığatındardıñ az ekeni de belgili boldı.

Armeniyanıñ körşilerimen bolğan qarım-qatınasına qarağanda Reseyden alıstay qoyatın jağdayı bayqalmaydı. Aytalıq, Äzerbayjan, Türkiya sındı körşilerimen qırğiqabaq qatınasta. Al, Iran, Gruziya sındı eldermen salqınqandı baylanısta. Bwl twrğıda ol Reseyden alıstap, Europa Odağına boy tarta qoymaydı. Degenmen, bwl aynaladağı körşiles elder men aymaqtarğa belgili därejede äser etpey qalmaydı.

“The Qazaq Times”