SİM orınbasarı Erjan Aşıqbaev

N'yu-York qalasında Qazaqstan Respublikası Sırtqı ister ministriniñ orınbasarı Erjan Aşıqbaev beybitşilik, qauipsizdik jäne twraqtı damudıñ özara baylanısı mäselelerine arnalğan Birikken Wlttar Wyımınıñ birqatar is-şaralarına qatıstı. Bwl turalı vedomstvonıñ resmi saytında habarlandı. 

23 qañtarda Qazaqstan Respublikasınıñ Twraqtı ökildigi Belarus' jäne Surinam delegaciyalarımen, sonday-aq BWW Damu bağdarlamasımen (BWWDB) birlesip «İlgerileu jäne twraqtı damu maqsatında jauaptı basqaru, qarusızdanu jäne taratpau» attı is-şara wyımdastırdı. BWW Bas hatşısınıñ kömekşisi jäne BWWDB-nıñ Europa jäne Aziya boyınşa öñirlik byuronıñ direktorı Djihan Sultanoglu is-şaranıñ moderatorı boldı. Jiın barısında BWW Bas Assambleyasınıñ törağası Piter Tomson, EKOSOS törağası Frederik Şava, BWW Bas hatşısınıñ Ekonomikalıq jäne äleumettik mäseleler boyınşa kömekşisi Lenni Mont'el, Belarus' Respublikasınıñ Sırtqı ister ministriniñ orınbasarı Valentin Rıbakov, BWW janında akkredittelgen diplomatiyalıq missiyalardıñ jäne akademiyalıq toptardıñ ökilderi söz söyledi.

Qazaqstannıñ Sırtqı ister ministriniñ orınbasarı öz sözinde qatısuşılardıñ nazarın Prezident Nwrswltan Nazarbaevtıñ halıqaralıq bastamalarına, onıñ işinde «Älem. XXI ğasır» Manifesine jäne BWW müşe memleketterdiñ jıl sayınğı qorğanıs byudjetiniñ 1% Wyımnıñ twraqtı damu qorına bölu turalı ideyasına audardı. Soñğı bastama qarjılıq ağımdardı qorğanıs keşeninen BWW Twraqtı damu maqsattarına qayta bağıttauğa mümkindik beredi.

24 qañtarda E. Aşıqbaev BWW Bas Assambleyasınıñ törağası bastama etken «Barlığı üşin twraqtı älemdi qwru: 2030 jılğa deyingi Twraqtı damudıñ kün tärtibi jäne beybitşilikti qoldau» taqırıbındağı Joğarı deñgeyli swhbattıñ aşıluına qatıstı. İs-şarağa qatısqan BWW Bas hatşısı Antoniu Guterriş, BWW BA törağası P. Tomson, EKOSOS törağası F. Şava, BWW Hatşılığı basşılığınıñ lauazımdı twlğaları, diplomattar, ükimettik emes wyımdardıñ, azamattıq jäne akademiyalıq qoğamdastıq ökilderi BWW jüyesi şeñberinde jäne odan tıs pänaralıq swhbattıñ negizinde jaña ideyalar men bastamalardı äzirleu jäne ilgeriletu arqılı twraqtı damudı iske asıruğa jäne beybitşilikti qoldau maqsatında pikir almastı.

E. Aşıqbaev Qazaqstannıñ wlttıq deñgeyde BWW-nıñ twraqtı damu salasındağı ğalamdıq kün tärtibin is jüzinde jüzege asıru boyınşa atqarıp otırğan is-şaraları, sonıñ işinde elimizdiñ halıqaralıq kelisilgen mindettemelerge beyildigi turalı QR Parlamenti Senatınıñ mälimdemesi turalı aqparattandırdı.

Sonımen qosa, E. Aşıqbaev Belarus' Sırtqı ister ministriniñ orınbasarı V. Rıbakovpen ekijaqtı kezdesu ötkizdi.

«The Qazaq Times»