Soltüstik Koreyanıñ eñ joğarı basşısı Kim Joñ Un. Foto: elinsignia.com.

AQŞ prezidenti Tramp pen Soltüstik Koreya basşısı Kim Joñ Unnıñ kezdesui turalı qazirge deyin egjey-tegjeyli mälimet joq. Degenmen, habarlarğa qarağanda eki el arasında qazirdiñ özinde qwpiya baylanıs ornatılğan. Bir kün bwrın AQŞ prezidenti atalğan kezdesudiñ mamır ayınıñ soñı nemese mausımnıñ bas şeninde ötetinin mälimdedi. Bwl turalı ABC News habarlağan.

Osıdan bwrın AQŞ lauazımdılarınıñ biri Soltüstik Koreya basşısı Kim Joñ Unnıñ Tramppen kezdesuge dayın ekenin jetkizgen edi. Kezdesudiñ ornı, naqtı uaqıt, qatısuşılar turalı egjey-tegjeyli mälimet qazirge deyin taratılmadı. Aqparat közderiniñ mälimdeuinşe, Uaşington (Washington) men Pioñyañ (Pyongyang) arasında kelissöz jürgizu isine baylanıstı dialog jürip jatır. Taraptar kelisimge kelgennen keyin ğana bwnday mälimetterdi aşıq jariyalauı mümkin.

Tramp pen Kim Joñ Unnıñ kezdesui öñir qauipsizdiginiñ ğana emes, älemniñ beybitşiligi twrğısında özindik salmağı bar kezdesu bolmaq. Sebebi, mwnda älemniñ bastı taqırıbı bolğan yadrolıq qaru jäne odan bas tartu turalı mäseleler söz bolmaq. Korey tübeginiñ yadrolıq qarusızdanuı älemdik geosayasatqa az bolmağan özgerister alıp keleri sözsiz.

Degenmen sarapşılar Soltüstik Koreya yadrolıq bağdarlamaların toqtatqanımen, qolında bar yadrolıq qaruınan bas tartuı ekitalay dep qaraydı.

Uaşingtondağı Wlttıq zertteu ortalığı Qorğanıs jönindegi zertteu basqarmasınıñ direktorı Garri Kazyanisidiñ pikirinşe, Soltüstik Koreya yadrolıq qarudan bas tartu talabın orındaudıñ ötemi tım auır boluı mümkin.  Ol sözinde: «Olar mümkin jüzdegen milliard qarjılay kömek swrauı jäne Qwrama Ştat armiyasınıñ Korey tübeginen şığıp ketuin talap etui bek mümkin. Bwnıñ sırtında Oñtüstik Koreyadan barlıq yadrolıq tehnologiyalar men yadrolıq reaktorlardan bas tartudı talap etui de ğajap emes", – dedi.

“The Qazaq Times”