سولتۇستىك كورەيانىڭ كەلىسسوز تالابى تىم اۋىر بولۋى مۇمكىن

اقش پرەزيدەنتى ترامپ پەن سولتۇستىك كورەيا باسشىسى كيم جوڭ ۋننىڭ كەزدەسۋى تۋرالى قازىرگە دەيىن ەگجەي-تەگجەيلى مالىمەت جوق. دەگەنمەن، حابارلارعا قاراعاندا ەكى ەل اراسىندا قازىردىڭ وزىندە قۇپيا بايلانىس ورناتىلعان. ءبىر كۇن بۇرىن اقش پرەزيدەنتى اتالعان كەزدەسۋدىڭ مامىر ايىنىڭ سوڭى نەمەسە ماۋسىمنىڭ باس شەنىندە وتەتىنىن مالىمدەدى. بۇل تۋرالى ABC News حابارلاعان.

وسىدان بۇرىن اقش لاۋازىمدىلارىنىڭ ءبىرى سولتۇستىك كورەيا باسشىسى كيم جوڭ ۋننىڭ ترامپپەن كەزدەسۋگە دايىن ەكەنىن جەتكىزگەن ەدى. كەزدەسۋدىڭ ورنى، ناقتى ۋاقىت، قاتىسۋشىلار تۋرالى ەگجەي-تەگجەيلى مالىمەت قازىرگە دەيىن تاراتىلمادى. اقپارات كوزدەرىنىڭ مالىمدەۋىنشە، ۋاشينگتون (Washington) مەن پيوڭياڭ (Pyongyang) اراسىندا كەلىسسوز جۇرگىزۋ ىسىنە بايلانىستى ديالوگ ءجۇرىپ جاتىر. تاراپتار كەلىسىمگە كەلگەننەن كەيىن عانا بۇنداي مالىمەتتەردى اشىق جاريالاۋى مۇمكىن.

ترامپ پەن كيم جوڭ ۋننىڭ كەزدەسۋى ءوڭىر قاۋىپسىزدىگىنىڭ عانا ەمەس، الەمنىڭ بەيبىتشىلىگى تۇرعىسىندا وزىندىك سالماعى بار كەزدەسۋ بولماق. سەبەبى، مۇندا الەمنىڭ باستى تاقىرىبى بولعان يادرولىق قارۋ جانە ودان باس تارتۋ تۋرالى ماسەلەلەر ءسوز بولماق. كورەي تۇبەگىنىڭ يادرولىق قارۋسىزدانۋى الەمدىك گەوساياساتقا از بولماعان وزگەرىستەر الىپ كەلەرى ءسوزسىز.

دەگەنمەن ساراپشىلار سولتۇستىك كورەيا يادرولىق باعدارلامالارىن توقتاتقانىمەن، قولىندا بار يادرولىق قارۋىنان باس تارتۋى ەكىتالاي دەپ قارايدى.

ۋاشينگتونداعى ۇلتتىق زەرتتەۋ ورتالىعى قورعانىس جونىندەگى زەرتتەۋ باسقارماسىنىڭ ديرەكتورى گارري كازيانيسيدىڭ پىكىرىنشە، سولتۇستىك كورەيا يادرولىق قارۋدان باس تارتۋ تالابىن ورىنداۋدىڭ وتەمى تىم اۋىر بولۋى مۇمكىن.  ول سوزىندە: «ولار مۇمكىن جۇزدەگەن ميلليارد قارجىلاي كومەك سۇراۋى جانە قۇراما شتات ارمياسىنىڭ كورەي تۇبەگىنەن شىعىپ كەتۋىن تالاپ ەتۋى بەك مۇمكىن. بۇنىڭ سىرتىندا وڭتۇستىك كورەيادان بارلىق يادرولىق تەحنولوگيالار مەن يادرولىق رەاكتورلاردان باس تارتۋدى تالاپ ەتۋى دە عاجاپ ەمەس", – دەدى.

“The Qazaq Times”