Resey: London otpen oynap otır

Resey tarabınıñ ötinişimen ötkizilgen BWW Qauipsizdik keñesiniñ jinalısında reseylik ökil Wlıbritaniya ükimetin ayıptap, Sergey Skripaldıñ ölimine qatıstı oydan şığarılğan şağımdarmen Reseyge jala jauıp otır dep sınğa aldı. Reseydiñ BWW-dağı twraqtı ökili Vasiliy Nebenzya sözinde: «London otpen oynap otır», – dep saldı. Bwl turalı BBC habarladı.

Mäskeu tarabı Sergey Skripal men onıñ qızınıñ ulanuına qatıstı tergeu isine reseylik tekseruşi ökilderdi de qatıstıru kerek degendi orta saldı. Bwğan qarsı pikir bildirgen Wlıbritaniya ökili: «Reseydiñ bwl talabı ört qoyğan adamnıñ qaytalay ört sebebin anıqtauğa qatısamın degenimen birdey», – degen pikirin bildirdi.

BWW-dağı Resey ökili sözinde, Sergey Skripal Resey azamatı bola twra, Britaniya jaq reseylik konsuldı oğan kirgizbey jatqanın aytıp şağımdandı. «London Mäskeumen ıntımaqtastıqtan bas tarttı. Sonıñ sebebinen Reseydiñ özge batıs elderimen qarım-qatınası qiındap ketti», – dedi. Ol jäne: «London jağı tergeu isterine reseylik ökilderdi kirgizbey otır, bwğan qosa tergeudiñ jaña mälimetterimen böliskisi kelmeydi», – dep sınğa aldı. Resey ökiliniñ aytuınşa, «Noviçoktıñ» atı orısşa bolğanımen, onı Batıs elderi oylap tauıptı jäne dälelsiz ayıptauların tınbay joldap jatqanı da kümän tuğızadı eken.

Degenmen, reseylik ökildiñ bwl sözi de jauapsız qalmadı. Wlıbritaniyanıñ BWW-dağı ökili Karen Pris sözinde: «Britaniya YUliya Skripaldıñ maqwldığı bolmasa reseylik konsuldı oğan jolıqtıra almaydı. Porton-Dun laboratoriyasınıñ zertteuşileri şabuılda qoldanılğan zattıñ «Noviçok» ekenin däleldegen. Qastandıq isiniñ artında Mäskeudiñ twrğanına bir emes, birneşe dälel bar», – dedi. Ol Reseyde jasalğan ulı zattıñ ne üşin Wlıbritaniyada bolıp qalğanına Kreml' äli jauap bere almay otırğanın alğa tarttı.

Wlıbritaniyanıñ BWW-dağı ökili Karen Pris. Foto: Reuters.

Tıyım salınğan himiyalıq qarular jönindegi wyım öziniñ ekspertterin Wlıbritaniyağa jibergen. Olarğa zardap şeguşilerden alınğan biologiyalıq ülgiler körsetilgen. Olar mwqiyat tekseruden keyin qorıtındı şığarmaq.

Britaniyanıñ talabı boyınşa Resey osı ekspertterdiñ şığarğan qorıtındısına maqwl boluı kerek. Alayda, Resey jağı öziniñ ekspertin tekseruge qatıstırğanda ğana ilanatının aytıp otır. Biraq London tarabı bwğan jol bermeytinin jetkizdi.

“The Qazaq Times”