رەسەي: لوندون وتپەن ويناپ وتىر

رەسەي تارابىنىڭ وتىنىشىمەن وتكىزىلگەن بۇۇ قاۋىپسىزدىك كەڭەسىنىڭ جينالىسىندا رەسەيلىك وكىل ۇلىبريتانيا ۇكىمەتىن ايىپتاپ، سەرگەي سكريپالدىڭ ولىمىنە قاتىستى ويدان شىعارىلعان شاعىمدارمەن رەسەيگە جالا جاۋىپ وتىر دەپ سىنعا الدى. رەسەيدىڭ بۇۇ-داعى تۇراقتى وكىلى ۆاسيلي نەبەنزيا سوزىندە: «لوندون وتپەن ويناپ وتىر»، – دەپ سالدى. بۇل تۋرالى BBC حابارلادى.

ماسكەۋ تارابى سەرگەي سكريپال مەن ونىڭ قىزىنىڭ ۋلانۋىنا قاتىستى تەرگەۋ ىسىنە رەسەيلىك تەكسەرۋشى وكىلدەردى دە قاتىستىرۋ كەرەك دەگەندى ورتا سالدى. بۇعان قارسى پىكىر بىلدىرگەن ۇلىبريتانيا وكىلى: «رەسەيدىڭ بۇل تالابى ءورت قويعان ادامنىڭ قايتالاي ءورت سەبەبىن انىقتاۋعا قاتىسامىن دەگەنىمەن بىردەي»، – دەگەن پىكىرىن ءبىلدىردى.

بۇۇ-داعى رەسەي وكىلى سوزىندە، سەرگەي سكريپال رەسەي ازاماتى بولا تۇرا، بريتانيا جاق رەسەيلىك كونسۋلدى وعان كىرگىزبەي جاتقانىن ايتىپ شاعىمداندى. «لوندون ماسكەۋمەن ىنتىماقتاستىقتان باس تارتتى. سونىڭ سەبەبىنەن رەسەيدىڭ وزگە باتىس ەلدەرىمەن قارىم-قاتىناسى قيىنداپ كەتتى»، – دەدى. ول جانە: «لوندون جاعى تەرگەۋ ىستەرىنە رەسەيلىك وكىلدەردى كىرگىزبەي وتىر، بۇعان قوسا تەرگەۋدىڭ جاڭا مالىمەتتەرىمەن بولىسكىسى كەلمەيدى»، – دەپ سىنعا الدى. رەسەي وكىلىنىڭ ايتۋىنشا، «نوۆيچوكتىڭ» اتى ورىسشا بولعانىمەن، ونى باتىس ەلدەرى ويلاپ تاۋىپتى جانە دالەلسىز ايىپتاۋلارىن تىنباي جولداپ جاتقانى دا كۇمان تۋعىزادى ەكەن.

دەگەنمەن، رەسەيلىك وكىلدىڭ بۇل ءسوزى دە جاۋاپسىز قالمادى. ۇلىبريتانيانىڭ بۇۇ-داعى وكىلى كارەن پريس سوزىندە: «بريتانيا يۋليا سكريپالدىڭ ماقۇلدىعى بولماسا رەسەيلىك كونسۋلدى وعان جولىقتىرا المايدى. پورتون-دۋن لابوراتورياسىنىڭ زەرتتەۋشىلەرى شابۋىلدا قولدانىلعان زاتتىڭ «نوۆيچوك» ەكەنىن دالەلدەگەن. قاستاندىق ءىسىنىڭ ارتىندا ماسكەۋدىڭ تۇرعانىنا ءبىر ەمەس، بىرنەشە دالەل بار»، – دەدى. ول رەسەيدە جاسالعان ۋلى زاتتىڭ نە ءۇشىن ۇلىبريتانيادا بولىپ قالعانىنا كرەمل ءالى جاۋاپ بەرە الماي وتىرعانىن العا تارتتى.

ۇلىبريتانيانىڭ بۇۇ-داعى وكىلى كارەن پريس. فوتو: Reuters.

تىيىم سالىنعان حيميالىق قارۋلار جونىندەگى ۇيىم ءوزىنىڭ ەكسپەرتتەرىن ۇلىبريتانياعا جىبەرگەن. ولارعا زارداپ شەگۋشىلەردەن الىنعان بيولوگيالىق ۇلگىلەر كورسەتىلگەن. ولار مۇقيات تەكسەرۋدەن كەيىن قورىتىندى شىعارماق.

بريتانيانىڭ تالابى بويىنشا رەسەي وسى ەكسپەرتتەردىڭ شىعارعان قورىتىندىسىنا ماقۇل بولۋى كەرەك. الايدا، رەسەي جاعى ءوزىنىڭ ەكسپەرتىن تەكسەرۋگە قاتىستىرعاندا عانا يلاناتىنىن ايتىپ وتىر. بىراق لوندون تارابى بۇعان جول بەرمەيتىنىن جەتكىزدى.

“The Qazaq Times”