Foto: Franciyanıñ "Le Figaro" basılımı

Türkiya ükimetiniñ Süriyanıñ Afrin aymağındağı "Zäytün bwtağı" operaciyasınan keyin Manbidj aymağın da YPG terrorlıq wyımınan azat etuge bekingeni belgili. Endi türikterdiñ osı äskeri operaciyalarına Franciya da aralasıp otırğan sıñaylı. Sebebi, soñğı uaqıttarı "Süriya Demokratiyalıq Küşteri" (SDF) degen ataumen atalıp jürgen "YPG" wyımınıñ belsendilerin qoldağan Franciya prezidenti Emmanuel' Makron, Türkiya men SDF arasında araağayındıq jasaudı maqsat etip otırğandığın jariyaladı.

"YPG" wyımınıñ belsendileri de Franciyanıñ özderine qoldau körsetu maqsatında Manbidjge äsker jiberuge uäde bergenin aytqan. Bwl turalı Francinıñ "Le Figaro" gazeti "YPG" wyımına qatıstı jariyalağan  maqalasında habarladı.

Atalğan habarda, "Mwnday şeşim Süriyanıñ soltüstigindegi Evfrat jazığında ornalasqan Manbidjde baqılau ornatu maqsatında äskeri qimıl bastauğa dayındalıp jatqan Türik küşteriniñ şabuılınıñ aldın aluğa bağıttalğan. Ankaradağı Franciya elşisine osı şeşimdi el prezidenti Rejep Tayıp Erdoğanğa jetkizu mindeti jükteldi. Beysenbi küni prezident Makron, Kürd jäne Süriya arab ökilderinen qwralğan bir delegaciyamen kezdesti. Kezdesu barısında Franciya äskeri birlikteriniñ Manbidj aymağına jiberiletindigi habarlandı" , - dep jazılğan. Alayda, atalğan şeşimge qatıstı Parijden äli resmi mälimdeme jasalmadı. Al Ankara ükimetiniñ bwl şeşimdi jılı qabıldamaytını tüsinikti.

Ayta ketu kerek, bügin Türkiya Sırtqı ister ministriniñ orınbasarı Ümit YAlçın, Vaşingtonda AQŞ ökildermen osı kürdeli mäsele turalı söylespek. Türkiya Sırtqı ister ministri Mevlut Çavuşoglu, Manbidjdi "YPG" terroristerinen tazartu üşin AQŞ-men ortaq "mämilege" kelgenin bwdan bwrın da aytqan edi. Aldağı josparğa säykes, Manbidjdegi qauipsizdikti Türkiya men AQŞ äskerleri birge jasamaq. Türkiyanıñ "YPG" terroristerin Manbidjden ketiruge şındap kirisip otırğanı anıq. Prezident Erdoğan aldıñğı küni jasağan mälimdemesinde "Manbidjden ketpeu" wstanımı Tramptıñ erkindegi närse emes" , -degen bolatın. Endi bwl mäselege Franciya da aralasa bastadı.

“The Qazaq Times”