فرانتسيا سۇرياعا اسكەر جىبەرەتىنىن مالىمدەدى

تۇركيا ۇكىمەتىنىڭ ءسۇريانىڭ افرين ايماعىنداعى ء"زايتۇن بۇتاعى" وپەراتسياسىنان كەيىن مانبيدج ايماعىن دا YPG تەررورلىق ۇيىمىنان ازات ەتۋگە بەكىنگەنى بەلگىلى. ەندى تۇرىكتەردىڭ وسى اسكەري وپەراتسيالارىنا فرانتسيا دا ارالاسىپ وتىرعان سىڭايلى. سەبەبى، سوڭعى ۋاقىتتارى ء"سۇريا دەموكراتيالىق كۇشتەرى" (SDF) دەگەن اتاۋمەن اتالىپ جۇرگەن "YPG" ۇيىمىنىڭ بەلسەندىلەرىن قولداعان فرانتسيا پرەزيدەنتى ەممانۋەل ماكرون، تۇركيا مەن SDF اراسىندا ارااعايىندىق جاساۋدى ماقسات ەتىپ وتىرعاندىعىن جاريالادى.

"YPG" ۇيىمىنىڭ بەلسەندىلەرى دە فرانتسيانىڭ وزدەرىنە قولداۋ كورسەتۋ ماقساتىندا مانبيدجگە اسكەر جىبەرۋگە ۋادە بەرگەنىن ايتقان. بۇل تۋرالى فرانتسينىڭ "Le Figaro" گازەتى "YPG" ۇيىمىنا قاتىستى جاريالاعان  ماقالاسىندا حابارلادى.

اتالعان حاباردا، "مۇنداي شەشىم ءسۇريانىڭ سولتۇستىگىندەگى ەۆفرات جازىعىندا ورنالاسقان مانبيدجدە باقىلاۋ ورناتۋ ماقساتىندا اسكەري قيمىل باستاۋعا دايىندالىپ جاتقان تۇرىك كۇشتەرىنىڭ شابۋىلىنىڭ الدىن الۋعا باعىتتالعان. انكاراداعى فرانتسيا ەلشىسىنە وسى شەشىمدى ەل پرەزيدەنتى رەجەپ تايىپ ەردوعانعا جەتكىزۋ مىندەتى جۇكتەلدى. بەيسەنبى كۇنى پرەزيدەنت ماكرون، كۇرد جانە ءسۇريا اراب وكىلدەرىنەن قۇرالعان ءبىر دەلەگاتسيامەن كەزدەستى. كەزدەسۋ بارىسىندا فرانتسيا اسكەري بىرلىكتەرىنىڭ مانبيدج ايماعىنا جىبەرىلەتىندىگى حابارلاندى" ، - دەپ جازىلعان. الايدا، اتالعان شەشىمگە قاتىستى پاريجدەن ءالى رەسمي مالىمدەمە جاسالمادى. ال انكارا ۇكىمەتىنىڭ بۇل شەشىمدى جىلى قابىلدامايتىنى تۇسىنىكتى.

ايتا كەتۋ كەرەك، بۇگىن تۇركيا سىرتقى ىستەر ءمينيسترىنىڭ ورىنباسارى ءۇمىت يالچىن، ۆاشينگتوندا اقش وكىلدەرمەن وسى كۇردەلى ماسەلە تۋرالى سويلەسپەك. تۇركيا سىرتقى ىستەر ءمينيسترى مەۆلۋت چاۆۋشوگلۋ، ءمانبيدجدى "YPG" تەرروريستەرىنەن تازارتۋ ءۇشىن اقش-مەن ورتاق "مامىلەگە" كەلگەنىن بۇدان بۇرىن دا ايتقان ەدى. الداعى جوسپارعا سايكەس، مانبيدجدەگى قاۋىپسىزدىكتى تۇركيا مەن اقش اسكەرلەرى بىرگە جاساماق. تۇركيانىڭ "YPG" تەرروريستەرىن مانبيدجدەن كەتىرۋگە شىنداپ كىرىسىپ وتىرعانى انىق. پرەزيدەنت ەردوعان الدىڭعى كۇنى جاساعان مالىمدەمەسىندە "مانبيدجدەن كەتپەۋ" ۇستانىمى ترامپتىڭ ەركىندەگى نارسە ەمەس" ، -دەگەن بولاتىن. ەندى بۇل ماسەلەگە فرانتسيا دا ارالاسا باستادى.

“The Qazaq Times”