Foto: worldbulletin.net

Europa Odağı Resey tarapınan aldağı uaqıtta tağı da orın aluı mümkin keleñsizdikterge saqaday-say boludıñ qamına kirisken sıñaylı. Ötken jıldıñ qırküyek ayında Resey özi wyımdastırğan äskeri jattığu kezinde mıñdağan äskeri men äskeri jabdıqtarın Europa şekarasına kirgizgen. "Evrensel.net" aqparat agenttigi "Europa Odağı aldağı uaqıtta da osı tektes keleñsizdikter orın almas üşin EO-ğa müşe elder arasında "Äskeri Şengen" jobasın qwruda" , - dep habarlaydı.

Qauipsizdik salasına bwrınğıdan da basımdıq berip, onıñ qwrılımın özgertudi maqsat etken EO, Reseydiñ soñğı jıldarı türli qauipti "oyındarğa" türtki boluına baylanıstı,"Äskeri Şengen aymağın" qwratının jariyaladı. EO Komissiyası äskeri qwral-jabdıq pen äskeri birlikterdiñ Euroodaqqa müşe bir elden ekinşi elge öterde kedergige wşırauına, äskeri mobil'dilikti jeñildetetin infraqwrılımnıñ joqtığına baylanıstı osınday şeşimge bekingen. Joğarıda atalğan aqparat agenttiginiñ habarlauınşa, EO sırtqı ister jäne qauipsizdik sayasatı Joğarı ökili äri Europalıq Komissiyanıñ vice-prezidenti Federika Mogerini Odaq işindegi äskeri mobil'dilik jeñildetilgen jağdayda äskeri şielenisterdi bwrınğıdan äldeqayda tiimdi äri jıldamıraq şeşuge bolatının aytqan. Atalğan jobanıñ bastı maqsatı retinde äskeri qwral-jabdıqtardıñ bir aymaqtan tötenşe oqiğa orın alğan ekinşi aymaqqa öte jıldam türde jetkizuine mümkindik jasau, tank jäne soğan wqsas äskeri kölikteriniñ kedergilerge wşıramastan, dittegen jerine jetuine mümkindik beretin köpir, jol jäne tunel'derdi qamtitın infraqwrılım jasau qarastırılğan.

Mamandar "Äskeri Şengen" bastamasınıñ jüzege asırıluı üşin NATO men EO arasında naqtı ıntımaqtastıq kerek. Ötken jılı AQŞ küşteriniñ Rumıniya men Bolgariyanıñ (Ekeui de NATO müşesi) şekarasında tölqwjat pen qaru-jaraq tekserisi üşin eki sağat kütuge mäjbür bolğanı "Äskeri Şengen" jobasına degen qajettilikti körsetedi" , - dep otır. Sayasatkerler de, qauip pen qaterge qarsı şara qoldanu üşin NATO küşteriniñ eñ az degende Resey birlikteri siyaqtı, tipti olardan da jıldam äreket etui kerektigin şegelep aytuda. Qısqası, joba jüzege asırılğannan keyin äskeri birlikter men qwral-jabdıqtar EO-ğa müşe bir elden ekinşisine nemese şekaralıq aymaqtarğa qazirgiden asa jıldam jetkizilmek.

Bayqap otırsaq, "Äskeri Şengen" Qırğiqabaq soğısınan (Suıq soğıs) keyin äskeri ıntımaqtastıq salasında barğan sayın bedeli tüsken äri Qırımdı basıp alğalı beri Resey tarapınan tuındauı mümkin keleñsizdikterge alañdaulı NATO-nıñ talabımen josparlanğan. NATO-nıñ bwlay alañdauına qwramındağı köp eldiñ Reseydiñ äskeri birlikteri siyaqtı öte operativti barlau jasap, jıldam qimıl körsetu qabiletine ie emestigi negiz bolğan siyaqtı.

 

“The Qazaq Times”