Foto: WordYou.ru

Apple kompaniyası Qıtaydıñ Kun'şan öñirinde ornalasqan zauıtta iPhone 8 Plus smartfonın öndirudi eki aptağa toqtattı. Mwnıñ sebebi  - qwral-jabdıqtardı jinaqtaumen aynalısatın Wistron korporaciyası sertifikattalmağan komponentterdi paydalanğan boluı mümkin. Bwl turalı tayvandıq Commercial Times basılımına silteme jasap, MacRumors habarlap otır. 

Basılımnıñ mälimetinşe, Wistron  Apple kompaniyasınıñ senimin qaytaru üşin birneşe joğarı lauazımdı twlğalarına ayıppwl salğan. Jetkizuşi kompaniya sonday-aq, smartfondardı öndiru jağday tüsindirilgenge deyin toqtatılğanın joqqa şığarıp otır. Alayda, tarağan keybir aqparatqa qarağanda Wistron akciyaları soñğı uaqıtta 5 payızğa tömendep ketken.

Al "sertifikattalmağan" su ötkizbeytin jalğan komponentteri bar smartfondar dükenderge jetkizile me jäne olardıñ sanı qanşa, ol jağı äli belgisiz.

Wistron qazirgi kezde  iPhone 8 Plus-tiñ tek 20 payızın ğana öndiredi, qalğan 80 payızı bäsekelesi Foxconn kompaniyasına tiesili. Wistron Ündistannıñ Bangalore qalasında jaña zauıt saluğa 157 mln dollar investiciya saldı. Mwnda kompaniya iPhone SE  jäne iPhone 6s smartfonın şığarudı josparlağan. Apple önimderin jetkizuşiler arasında atalğan korporaciya ündi narığındağı köşbasşılardıñ biri.

“The Qazaq Times”