QR Sırtqı ister ministrligi men BAÄ ökilderi vizasız rejim kelismin jasadı. Foto: facebook.com

10 naurızdan bastap Qazaqstan azamattarı Birikken Arab Ämirlikterine vizasız kire alatın boladı. Bwl turalı QR Sırtqı ister ministrliginiñ resmi ökili Änuar Jaynaqov öziniñ feysbuk paraqşasında jazdı.

"Qazaqstan jäne BAÄ 2017 jılğı mamırda qol qoyılğan eki el azamattarın, wlttıq pasport ielerin 30 künge deyin vizadan bosatudı közdeytin kelisim boyınşa işkimemlekettik proceduraların ayaqtadı", - dep jazdı ol.

Kelisim 2018 jılğı 10 naurızda küşine enedi.

"Qazaqstan Sırtqı ister ministrligi öz azamattarı üşin vizasız rejim geografiyasın keñeytu bağıtındağı belsendi jwmısın jalğastıradı", - delingen habarlamada.

Ayta keteyik, ötken jıldıñ tamız ayında qazaqstandıq tarap jalpıazamattıq pasporttarın ielenuşi eki memleket azamattarınıñ 30 künge deyin vizadan bosatıluın közdeytin qwjattıñ küşine enui üşin memlekettik räsimderdi ayaqtağan bolatın.

Öz kezeginde Ämirlikter tarapı da Qazaqstan azamattarınıñ BAÄ-ge vizasız baruına mümkindik beretin qol qoyılğan eki jaqtı hattamanıñ küşine enui üşin memleketik räsimder ayaqtaluğa jaqın ekenin habarlağan.

“The Qazaq Times”