ەندى اراب امىرلىكتەرىنە ۆيزاسىز بارۋعا مۇمكىندىك بار

10 ناۋرىزدان باستاپ قازاقستان ازاماتتارى بىرىككەن اراب امىرلىكتەرىنە ۆيزاسىز كىرە الاتىن بولادى. بۇل تۋرالى قر سىرتقى ىستەر مينيسترلىگىنىڭ رەسمي وكىلى ءانۋار جايناقوۆ ءوزىنىڭ فەيسبۋك پاراقشاسىندا جازدى.

"قازاقستان جانە ءباا 2017 جىلعى مامىردا قول قويىلعان ەكى ەل ازاماتتارىن، ۇلتتىق پاسپورت يەلەرىن 30 كۇنگە دەيىن ۆيزادان بوساتۋدى كوزدەيتىن كەلىسىم بويىنشا ىشكىمەملەكەتتىك پروتسەدۋرالارىن اياقتادى", - دەپ جازدى ول.

كەلىسىم 2018 جىلعى 10 ناۋرىزدا كۇشىنە ەنەدى.

"قازاقستان سىرتقى ىستەر مينيسترلىگى ءوز ازاماتتارى ءۇشىن ۆيزاسىز رەجيم گەوگرافياسىن كەڭەيتۋ باعىتىنداعى بەلسەندى جۇمىسىن جالعاستىرادى", - دەلىنگەن حابارلامادا.

ايتا كەتەيىك، وتكەن جىلدىڭ تامىز ايىندا قازاقستاندىق تاراپ جالپىازاماتتىق پاسپورتتارىن يەلەنۋشى ەكى مەملەكەت ازاماتتارىنىڭ 30 كۇنگە دەيىن ۆيزادان بوساتىلۋىن كوزدەيتىن قۇجاتتىڭ كۇشىنە ەنۋى ءۇشىن مەملەكەتتىك راسىمدەردى اياقتاعان بولاتىن.

ءوز كەزەگىندە امىرلىكتەر تاراپى دا قازاقستان ازاماتتارىنىڭ ءباا-گە ۆيزاسىز بارۋىنا مۇمكىندىك بەرەتىن قول قويىلعان ەكى جاقتى حاتتامانىڭ كۇشىنە ەنۋى ءۇشىن مەملەكەتىك راسىمدەر اياقتالۋعا جاقىن ەكەنىن حابارلاعان.

“The Qazaq Times”