Foto: life.ru

2014 jılı Soçide ötken Olimpiada oyındarında doping qoldanğan degen ayıppen Halıqaralıq Olimpiada komitetiniñ şeşimimen älemdik sporttıq dodalarğa qatısudan şettetilgen reseylik sportşılardıñ isi  büginnen bastap, Sporttıq arbitrajdı sotta (Court of Arbitration for Sport (CAS)) qaraladı. Olar özderine tağılğan ayıp pen ömir boyına Olimpiada oyındarına qatıstırılmau jazasınıñ küşi joyılğanın qalaydı. Bwl turalı AFP aqparattıq agenttigi jazdı.

Aldağı Olimpiada oyındarı qarsañında Reseydiñ sport salasınıñ bolaşağın anıqtaytın mañızdı sot otırısı Lozannadan Jenevağa köşirilip, ortalıqta ötetin boldı. Sot tıñdalımına 39 reseylik sportşı qatısadı dep kütilude. Kuägerlerdiñ qatarında 2014 jılğı Soçi Olimpiadası kezinde antidopingtik zerthananı basqarğan Grigoriy Rodçenkov pen kanadalıq qorğauşı, atalğan is boyınşa täuelsiz zertteu jürgizgen  Riçard Maklaren bar.

Atalğan dau Grigoriy Rodçenkovtıñ Reseydiñ memlekettik doping bağdarlaması men biliktiñ tapsırmasımen özi oylap tapqan atletterdiñ ağzasında anıqtaluı qiın, biraq ağzağa ülken küş beretin himiyalıq qospa turalı atışulı mälimdemesinen keyin bastaldı. RUSADA-nıñ (Reseydiñ antidopingtik agenttigi) qos birdey eks-basşısı qaza tapqannan keyin, AQŞ-qa ketip qalğan Grigoriy Rodçenkov Sot otırısına qatıspaydı. Ol arnayı video-baylanıs arqılı kuälik etedi.

Sot şeşimi 29 qañtar men 2 aqpan aralığında belgili boladı. Osıdan bwrın Halıqaralıq Olimpiada komiteti 2018 jılı Pioñçañda ötetin qısqı Olimpiada oyındarına qatısuğa nietti reseylik sportşılar arnayı tağayındalğan doping sınamasın tapsırıp, qanınan bögde zattar tabılmasa, öz memleketiniñ emes, "neytraldı" tu astında öner körsete alatını jöninde mälimdeme jasağan bolatın.

“The Qazaq Times”