AQŞ-Meksika qamalı. Foto: Mike Blake/Reuters

AQŞ prezidenti Donald Tramp bügin Meksika şegekarasında qorğan twrğızuğa nwsqau berip, onı iske asıru josparların da qarastırdı. Sonımen qatar, lañkestik piğıldardı boldırmas üşin, Süriyadan (Siriya) kiretin bosqındarğa tiım salıp, el işindegi bosqındardıñ qimılına şekteu qoyu qatarlı tapsırmalar berdi. Bwlardı erterek jüzege asıru üşin, osı aptadan bastap naqtı äreketter jasamaq.

Tramp Meksika şekarasına qamal twrğızbaq. Foto: ugblizz.com

Ötken jıldıñ soñında, Tramp taqqa otırğannan keyin bosqındardı şekteytini turalı saytımızda arnayı saraptamalıq maqala jariyalağan edik. Onda Meksika, Latın-Amerika, Qıtay, Ündistan jäne mwsılman elderinen kiretin bosqındarğa şekteu qoyatının, onıñ saldarı turalı öz pikirimizdi aytqan bolatınbız. Tramp prezidenttikke otırğan alğaşqı apta AQŞ jäne oğan baylanıstı älem elderine asa mañızdı bolğan şeşimderdi qabıldaumen bastaldı. Keşe TPP-dan bas tartuğa şeşim jasasa, bügin körşisimen arada qamal twrğızudı bwyırdı. Bwl ekeui de onıñ saylau nauqanında aytqan uädeleriniñ qatarında bar bolatın.

Meksika-AQŞ şekarası tarihtan beri Uaşingtonnıñ bas auıruı bolıp keledi. Latın Amerikasınan Meksikanı basıp, AQŞ-qa kiretin esirtki saudasınıñ közge körinbeytin «wlı jülgesi» ğasır boyına qalıptasıp, ornıqqan. Mwsılman elderindegi art-artınan tuılğan soğıstardan keyin, bwl jol – bosqındardıñ da zañsız şekara attaytın eñ negizgi "soqpağı" bolıp keledi. Endi mine amerikalıqtar müddesin qorğap, olarğa bergen uädesin orındau üşin Donald Tramp bwl şekarağa qamal twrğızudı tapsırdı. Aqüy şendileriniñ aytısına qarağanda, qamal qwrlısına federaldıq qarjılay kömek te körsetiledi. Tipti, osı aptadan bastap jospardı jüzege asıru şaraların qolğa almaq. Mwnıñ işinde mwsılman elderininen keletin bosqındarğa şekteu qoyu da qamtılğan.

Tramptıñ bwl şeşimderi AQŞ kongresinde äli qabıldanbadı. Dese de, Tramp öziniñ uädesin orındağış prezident ekenin äygileu üşin bolsa da, saylau kezindegi aytqandarın bir-birlep iske asırıp keledi. Bwl Tramp AQŞ-tı agressivti minezge bağıttap otırğanın körsetedi.  Onıñ jasap jatqan isteriniñ Amerika üşin keri äserleri de bar. Alayda, bwl keri äser jaqın arada közge körine qoymaydı. Amerikanıñ oqşaulanuı jıldardıñ ötuimen «Amerika birinşi» sayasatın qwr ayğayğa aynaldırmasına kim kepil. TPP-dan bas tartqan AQŞ üşin Kanada men Meksika Soltüstik Amerikadağı eñ negizgi sauda serikteri edi. Meksika şekarasına qamal qoyu eki eldiñ sauda-äriptestik qatınasına tiimdilik äkelmes.  Al Tramp: “qamal salu – zañsız köşi-qondı tejeudiñ eñ mañızdı şarası” dep otır.

 

“The Qazaq Times”