Qıtaydıñ jasap şığarğan eñ alıp "qosmekendi wşağı". Foto: Hightech.fm.

Älemdegi eñ alıp su men qwrlıqqa birdey qonuğa arnalğan wşaq sınaqtan ötti. Bwl Qıtay jasap şığarğan AG600 attı wşaq. Ülkendigi «Boyng-747» wşağına para-par bwl wşaqtı jasap şığuğa Qıtay 8 jıl uaqıt jwmsağan. Wşaq Qıtaydıñ oñtüstik-şığısındağı Guañdoñ (Guangdong/广东) provinciyasına qarastı Jouhay qalasınan äuege köterilip, keñistikte bir sağattıq sınaq merzimin ayaqtattı. Bwl turalı BBC-diñ resmi saytı habarladı.

AG600 wşağınıñ äuege köteriluin Qıtay memlekettik telearnaları tikeley efirde tarattı. Onıñ äuejayğa qaytıp oraluın jüzdegen adam äskeri orkestrdiñ süyemelinde qarsı aldı. Bwl wşaq 50 alamdı alıp, äuede 12 sağat wşuğa qabiletti. Resmi türde ört söndiruge, sudağı qwtqaru jwmıstarına arnalıp jasalğanın habarladı.

Degenmen AG600 wşağın äskeri maqsattarda qoldanuğa da boladı. Aytalıq, ol Qıtay talasıp kele jatqan Oñtüstik Qıtay teñiziniñ barlıq araldarınan wşıp öte aladı. Qıtaydıñ resmi «Şinhau» aqparattıq agenttigi atalğan wşaq turalı taratqan habarında «AG600 – teñiz ben araldardıñ qorğauşısı» dep atadı.

Qıtay jartı ğasırdan beri Oñtüstik Qıtay teñizine tolıqtay ielik etuge tırısıp keledi. Alayda, onıñ işinde teñizben şektesip jatqan basqa elderdiñ de öziniki dep ösepteytin wsaq araldarı bar. Soñğı jıldarı Qıtay jasandı araldardı köbeytip, oğan äskeri infraqwrılımdarın ornalastıruda. Ötken jıldıñ soñında Amerikanıñ strategiyalıq jäne halıqaralıq zertteu ortalığınıñ ekspertteri sputnikten tüsirgen suretterden jasandı araldarda zımıran qorğanıs jüyeleriniñ bar ekeni mälim bolğan.

AQŞ Qıtaydı strategiyalıq teñizderden jüzip ötuge tosqauıl qoydı dep ayıptap, ötken jılı mausım ayında Gaagadağı halıqaralıq sotta Oñtüstik Qıtay teñizin paydalanu boyınşa Qıtay eşqanday da basımdıqqa ie emes degen şeşim şığarğan edi. Halıqaralıq sotqa 2013 jılı Filippin jağı «Qıtay halıqaralıq qwqıqtardı bwzıp jatır» degen şağımın tüsirgen.

Qıtay jaq bol ayıptıñ bärin joqqa şığarıp, talastı aymaqtardıñ bärin öziniñ ekonomikalıq aymağı dep atauda. Olar jäne bwl aymaqtı «2 mıñ jıldan beri qoldanıp kelemiz» degen. Gaagadağı sot öz şeşimi üşin BWW-nıñ konvenciyasındağı jobalardı paydalanğan.

2016 jılğa jetkende Qıtay jasandı araldarınan äskeri wşaqtarın wşıra bastadı. Degenmen, bwl jasandı araldarda twrğındar joq.

“The Qazaq Times”