Foto: riafan.ru

Düysenbi küni AQŞ-tıñ BWW-dağı ökili Nikki Heyli BWW Qauipsizdik Keñesiniñ "Donal'd Tramptıñ Ierusalimdi Izrail'diñ astanası dep moyındau turalı şeşimin toqtatu turalı" rezolyuciyasına veto qoydı. Bwl - Heylidiñ AQŞ-tıñ BWW-dağı elşisi retinde veto qwqığın alğaş ret paydalanuı. AQŞ-tıñ Ierusalim dauına qatıstı şeşimin zañsız dep tabu turalı Mısır wsınğan rezolyuciyanı Amerikanıñ jaqın seriktesteri Wlıbritaniya, Franciya, Italiya, Japoniya men Ukraina da qoldadı. Bwl turalı AFP aqparattıq agenttigi jazdı. 

Rezolyuciyada "Ierusalim qalasınıñ statusı Palestina men Izrail' arasındağı kelissözder negizinde şeşilui kerek, onan bölek bir jaqtı üşinşi memleket tarapınan qabıldanğan şeşimder zañsız bolıp esepteledi" delingen. Qwjattıñ qabıldanuı üşin Keñes müşeleriniñ toğız müşesi onı qoldap dauıs berse jetkilikti. Degenmen Qauipsizdik keñesiniñ 5 müşesi: AQŞ, Resey, Qıtay, Wlıbritaniya jäne Franciya barlıq dauıstardı joqqa şığarıp, kez kelgen şeşimniñ qabıldanuın toqtatatın veto qwqığına ie.

"Eşkim de Amerikağa elşilikterin qayda ornalastıru turalı nwsqaulıqtar bere almaydı!", -dedi Nikki Heyli. AQŞ-tıñ BWW-dağı ökili sonday-aq keñes müşeleriniñ birauızdan qabıldanğan şeşimin "AQŞ-tı qorlau" dep atap, olardıñ bwl äreketi wmıtılmaytının jetkizdi.

Izrail'diñ Prem'er-ministri Bend'yamin Netan'yahu öziniñ tvitter paraqşasında: "Şındıq jalğandıqtı tübinde jeñedi. Rahmet, Prezident Tramp. Rahmet, Nikki Heyli", -  dep jazdı.  Palestinalıqtar vetoğa qatıstı narazılıq bildirip, rezolyuciyanı BWW-nıñ Bas Assambleyasında qaraudı talap etti. BWW-nıñ 193-şi assambleyasında qabıldanğan rezolyuyaciyalarğa veto qwqığı paydalanılmaydı.

“The Qazaq Times”