فوتو: riafan.ru

دۇيسەنبى كۇنى اقش-تىڭ بۇۇ-داعى وكىلى نيككي حەيلي بۇۇ قاۋىپسىزدىك كەڭەسىنىڭ "دونالد ترامپتىڭ يەرۋساليمدى ءيزرايلدىڭ استاناسى دەپ مويىنداۋ تۋرالى شەشىمىن توقتاتۋ تۋرالى" رەزوليۋتسياسىنا ۆەتو قويدى. بۇل - حەيليدىڭ اقش-تىڭ بۇۇ-داعى ەلشىسى رەتىندە ۆەتو قۇقىعىن العاش رەت پايدالانۋى. اقش-تىڭ يەرۋساليم داۋىنا قاتىستى شەشىمىن زاڭسىز دەپ تابۋ تۋرالى مىسىر ۇسىنعان رەزوليۋتسيانى امەريكانىڭ جاقىن سەرىكتەستەرى ۇلىبريتانيا، فرانتسيا، يتاليا، جاپونيا مەن ۋكراينا دا قولدادى. بۇل تۋرالى AFP اقپاراتتىق اگەنتتىگى جازدى. 

رەزوليۋتسيادا "يەرۋساليم قالاسىنىڭ ستاتۋسى پالەستينا مەن يزرايل اراسىنداعى كەلىسسوزدەر نەگىزىندە شەشىلۋى كەرەك، ونان بولەك ءبىر جاقتى ءۇشىنشى مەملەكەت تاراپىنان قابىلدانعان شەشىمدەر زاڭسىز بولىپ ەسەپتەلەدى" دەلىنگەن. قۇجاتتىڭ قابىلدانۋى ءۇشىن كەڭەس مۇشەلەرىنىڭ توعىز مۇشەسى ونى قولداپ داۋىس بەرسە جەتكىلىكتى. دەگەنمەن قاۋىپسىزدىك كەڭەسىنىڭ 5 مۇشەسى: اقش، رەسەي، قىتاي، ۇلىبريتانيا جانە فرانتسيا بارلىق داۋىستاردى جوققا شىعارىپ، كەز كەلگەن شەشىمنىڭ قابىلدانۋىن توقتاتاتىن ۆەتو قۇقىعىنا يە.

"ەشكىم دە امەريكاعا ەلشىلىكتەرىن قايدا ورنالاستىرۋ تۋرالى نۇسقاۋلىقتار بەرە المايدى!", -دەدى نيككي حەيلي. اقش-تىڭ بۇۇ-داعى وكىلى سونداي-اق كەڭەس مۇشەلەرىنىڭ ءبىراۋىزدان قابىلدانعان شەشىمىن "اقش-تى قورلاۋ" دەپ اتاپ، ولاردىڭ بۇل ارەكەتى ۇمىتىلمايتىنىن جەتكىزدى.

ءيزرايلدىڭ پرەمەر-ءمينيسترى بەنديامين نەتانياحۋ ءوزىنىڭ تۆيتتەر پاراقشاسىندا: "شىندىق جالعاندىقتى تۇبىندە جەڭەدى. راحمەت، پرەزيدەنت ترامپ. راحمەت، نيككي حەيلي", -  دەپ جازدى.  پالەستينالىقتار ۆەتوعا قاتىستى نارازىلىق ءبىلدىرىپ، رەزوليۋتسيانى بۇۇ-نىڭ باس اسسامبلەياسىندا قاراۋدى تالاپ ەتتى. بۇۇ-نىڭ 193-ءشى اسسامبلەياسىندا قابىلدانعان رەزوليۋياتسيالارعا ۆەتو قۇقىعى پايدالانىلمايدى.

“The Qazaq Times”