Foto: theconversation.com

Parsı şığanağı elderi Batıs Afrikadağı Sahel aymağındağı jihadşılarmen küresuge 130 mln euro böletin boldı. Bwl turalı Franciya Prezidenti Emanuel' Makron men Parsı şığanağı elderiniñ basşıları kezdesken jiınnan keyin  AFP aqparattıq agenttigi jazdı. 

Saud Arabiyası 100 mln euro berse, Birikken Arab Ämirlikteri qalğan 30 mln euronı öteuge uäde berdi. Qos memleket te öziniñ terrorizmge qarsı küreske belsene atsalısıp otırğanın däleldeuge ıntalı.

Jinalğan qarjı G5 Sahel küşteriniñ qajettilikterin öteu üşin jwmsaladı. Bwl Burkino-Faso, Çad, Mavritaniya, Mali jäne Niger äskeri küşterinen qwralğan jasaq. Öñirdegi terrorizmge qarsı küreste kedey memleketterden qwralğan äskeri odaqqa qarjınıñ tapşılığı qolbaylau bolatın. Endi osı qwramdı äskeri dayındıqtan ötkizu, qaru-jaraq pen qwral-jabdıqtar jetkizu qwnın mwnayğa bay memleketter öz moynına aladı.

Parijdiñ sırtındağı tarihi qamaldardıñ birinde ötken kezdesuden keyin jurnalisterge bergen swhbatında Franciyanıñ Prezidenti Emanuel' Makron: "Kün sayın şabuıldar bolıp jatır. Terrorizm öñirdegi twtas memlektterge qauip töndirip otır", -dedi.

2018 jıldıñ ortasına qaray 5 mıñ adamnan twratın äskeri jasaq ekstremisterge qarsı jaña soqqılar beredi dep josparlanıp otır.  Maqsat - qatarı tolıqqan terroristerdiñ közin joyu.Sebebi Süriyadağı lañkestik toptardıñ jeñilisinen keyin, ekstremisterdiñ ülken ağını Afrika memleketterindegi Äl-Kaidanıñ özge qwrılımdarına qaray qosıluı mümkin.

“The Qazaq Times”